പിന്നാക്ക വികസന ഫണ്ട് വിനിയോഗം.... കടുത്ത അലംഭാവം, പാഴായത് കോടികൾ

കോട്ടയം : പ്ളാൻ ഫണ്ടിൽ കോടികളുണ്ടായിട്ടും പട്ടികജാതി,​ വ‌ർഗ വികസനത്തിനായി തുക ചെലവഴിക്കുന്നതിൽ വൻ അലംഭാവം. കഴിഞ്ഞ പത്ത് വർഷത്തിനിടെ ലഭിച്ച തുകയുടെ പാതിപോലും ചെലവഴിച്ചിട്ടില്ല. ചെലവഴിക്കാത്ത തുകയുടെ നിശ്ചിതശതമാനം സ്പിൽ ഓവറായി അടുത്ത വർഷം നൽകുമെങ്കിലും ബാക്കി തുക മുഴുവൻ പാഴാകുന്നു. പട്ടിക ജാതി,​ വർഗ മേഖലയിൽ ഇപ്പോഴും വികസനമെത്താത്തപ്പോഴാണ് കൈയിലുള്ള തുക ചെലവഴിക്കാതെ ഉദ്യോഗസ്ഥരുടെ അനാസ്ഥ.

ഭൂരഹിത പുനരധിവാസ പദ്ധതി,​ മിശ്ര വിവാഹ ധനസഹായം,​ ചികിത്സാ സഹായം ഉൾപ്പെടെ വിവിധ മേഖലകളിലാണ് സാധാരണ പദ്ധതി ചെലവഴിക്കാൻ കഴിയുക. എന്നാൽ വിവാഹ,​ മിശ്രവിവാഹവുമായി ബന്ധപ്പെട്ട് ആയിരത്തോളം അപേക്ഷകൾ കെട്ടിക്കിടക്കുമ്പോഴാണ് കിട്ടിയ പണം പോലും ചെലവഴിക്കാതിരിക്കുന്നത്.

പ്രത്യേക പദ്ധതികളും വിഭാവനം ചെയ്യാതെ

പ്രത്യേക പദ്ധതികൾ വിഭാവനം ചെയ്ത് വികസനം സാദ്ധ്യമാക്കുകയും ചെയ്യാമെങ്കിലും ഇതിനൊന്നും ഉദ്യോഗസ്ഥർ താത്പര്യം കാട്ടുന്നില്ല. എസ്.ടി ഫണ്ട് ചെലവഴിക്കുന്നതിലാണ് കൂടുതൽ അനാസ്ഥ. വെറും മൂന്ന് ശതമാനം തുക ചെലവഴിച്ച വർഷവുമുണ്ടായിട്ടുണ്ട്. പട്ടിക വർഗ ഫണ്ട് 2022 - 23ൽ മാത്രമാണ് നൂറു ശതമാനവും നിയോഗിച്ചത്. ഓരോ വിഭാഗത്തിലുമായി ശരാശരി പത്ത് കോടിക്ക് മുകളിൽ ഒരു വർഷം ലഭിക്കും. ചെലവഴിക്കുന്നതാകട്ടെ പകുതിക്കും താഴെ.

ചെലവഴിച്ച പട്ടിക ജാതി ഫണ്ട്

2015-16: 63.6%

2016-17: 57.1 %

2017-18: 43.4%

2018-19: 33.8

2019-20: 19.4%

2020-21: 47%

2021-2022 : 89.05%

2022-23: 63.2%

2023:24: 49.9%

2024:25: 46.7%

ചെലവഴിച്ച പട്ടിക വർഗ ഫണ്ട്

2015 -16: 80.3

2016-17: 31.3

2017-18: 3.4

2018-19: 24.8

2019-20: 59.3

2020-21: 29.7

2021-2022:76.4

2022-23: 100

2023:24:50.8

2024:25: 54.4

'' പിന്നാക്ക വിഭാഗങ്ങളോടുള്ള അവഗണനയാണ് ഫണ്ട് വനിയോഗിക്കുന്നതിലെ അലംഭാവത്തിന് കാരണം. അപേക്ഷകൾ കെട്ടിക്കിടക്കുമ്പോഴും അർഹർക്ക് കൊടുക്കാതെ പണം പാഴാക്കുന്നത് പ്രതിഷേധാർഹമാണ്.

ബിജു വഴിപ്പറമ്പിൽ, വിവരാവകാശ പ്രവർത്തകൻ