ബാണാസുര ഡാമിന്റെ ഒരു ഷട്ടർ തുറന്നു

കൽപ്പറ്റ: ബാണാസുര സാഗർ ഡാമിലെ ഒരു സ്പിൽവെ ഷട്ടർ തുറന്നു. മൂന്ന് തവണ സൈറൺ മുഴക്കിയശേഷം ഇന്നലെ രാവിലെ 10 മണിയോടെ 10 സെന്റിമീറ്റർ ഷട്ടർ ഉയർത്തി ഘട്ടംഘട്ടമായി കാരമാൻ തോട്ടിലൂടെ അധിക ജലം ഒഴുക്കി വിട്ടു. കാരമാൻതോടിന്റെ ഇരുകരകളിലുമുള്ളവർ ജാഗ്രത പാലിക്കണമെന്നും പുഴയിലേക്ക് ഇറങ്ങുന്നവർക്കെതിരെ കർശന നടപടികൾ സ്വീകരിക്കുമെന്നും പൊലീസ് അറിയിച്ചിരുന്നു. പുഴയുടെ തീരങ്ങളിലുള്ളവരും താഴ്ന്ന പ്രദേശങ്ങളിൽ താമസിക്കുന്നവരും ജാഗ്രത പാലിക്കണമെന്ന് ജില്ലാ ദുരന്ത നിവാരണ അതോറിറ്റി ചെയർപേഴ്സൺ കൂടിയായ ജില്ലാ കളക്ടർ ഡി.ആർ. മേഘശ്രീ നിർദ്ദേശം നൽകിയിരുന്നു. അടിയന്തര സാഹചര്യങ്ങളിൽ 1077 നമ്പരിൽ വിളിക്കാം.