അവകാശികളില്ല, ഇടവുമില്ല; മോർച്ചറി നിറയുന്നു

പ്രവർത്തനം സ്തംഭനത്തിലേക്ക്

അത്താണി: തൃശൂർ ഗവ. മെഡിക്കൽ കോളേജ് ആശുപത്രിയിലെ കോൾഡ് റൂമിലും ഫോറൻസിക് മോർച്ചറിയിലും അജ്ഞാത മൃതദേഹങ്ങൾ നിറയുന്നു. മൃതദേഹങ്ങൾ സൂക്ഷിക്കുന്നതിനുള്ള സൗകര്യങ്ങളുടെ അപര്യാപ്തതയെ തുടർന്ന് മോർച്ചറി പ്രവർത്തനം ഭാഗികമായി തടസപ്പെട്ടു.
കോൾഡ് റൂമിലെ 14 ഫ്രീസർ യൂണിറ്റുകളിലും തിരിച്ചറിയപ്പെടാത്തതും ബന്ധുക്കൾ ഏറ്റെടുക്കാത്തതുമായ മൃതദേഹങ്ങളാണ് നിലവിലുള്ളത്. ഫോറൻസിക് മോർച്ചറിയിലെ 15 റാക്കുകളിൽ 13 എണ്ണത്തിലും അജ്ഞാത മൃതദേഹങ്ങളാണ്. അനാഥരായ രോഗികളുടെ എണ്ണം വർദ്ധിക്കുന്നതാണ് പ്രതിസന്ധിക്ക് കാരണം.
വയോധികരും അവശരുമായ രോഗികളാണ് ഇവരിൽ ഏറെയും. ഇത്തരത്തിൽ 40ഓളം പേർ നിലവിൽ ആശുപത്രിയിൽ ചികിത്സയിലുണ്ട്. ഇവരിൽ പലരും മരിച്ചാൽ മൃതദേഹങ്ങൾ മോർച്ചറിയിലേക്കോ കോൾഡ് റൂമിലേക്കോ മാറ്റേണ്ടിവരും.

സംസ്‌കരിക്കുന്നതിനും നൂലാമാലകൾ

• പൊലീസിന്റെ നിരാക്ഷേപ സർട്ടിഫിക്കറ്റ് (എൻ.ഒ.സി.) ലഭിക്കുന്നതിലെ കാലതാമസം
• പഞ്ചായത്ത് അധികൃതർ മൃതദേഹങ്ങൾ ഏറ്റെടുക്കുന്നതിനുള്ള നടപടികൾ സമയബന്ധിതമായി പൂർത്തിയാക്കാത്തത്.
• (തദ്ദേശ സ്വയംഭരണ സ്ഥാപനങ്ങളുടെ സഹായത്തോടെയാണ് പൊലീസ് മൃതദേഹങ്ങൾ സംസ്‌കരിക്കുന്നത്)
• മൃതശരീരം കണ്ടെത്തിയ സ്ഥലത്ത് പരിശോധന നടത്തി ബി.എൻ.എസ്.എസ്. പ്രകാരം ഇൻക്വസ്റ്റ് തയ്യാറാക്കണം
• സർക്കാർ ആശുപത്രിയിൽ പോസ്റ്റ്‌മോർട്ടം പൂർത്തിയാക്കുകയും ഫോട്ടോ, വസ്ത്രങ്ങൾ തുടങ്ങിയ വിവരങ്ങൾ പൊതുജനങ്ങളുടെ അറിവിലേക്കായി പ്രസിദ്ധപ്പെടുത്തുകയും വേണം.
• തുടർന്ന് മിസ്സിംഗ് ലിസ്റ്റുമായി ഒത്തുനോക്കി അവകാശികളെ കണ്ടെത്താൻ ശ്രമിക്കണം.
• അവകാശികളെ കണ്ടെത്തുന്നതിന് സാധാരണയായി 72 മണിക്കൂർ വരെയെങ്കിലും മൃതദേഹം മോർച്ചറിയിൽ സൂക്ഷിക്കണം

പുതുതായി ലഭിക്കുന്ന മൃതദേഹങ്ങൾ മറ്റ് ആശുപത്രികളിലെ മോർച്ചറി, കോൾഡ് സ്റ്റോറേജ് സൗകര്യങ്ങളിലേക്ക് മാറ്റണം. ഡിസ്ചാർജ് ചെയ്യാവുന്ന രോഗികളെ പരിചരിക്കുന്നതിന് സംവിധാനമുണ്ടാക്കണം. അപകടനില തരണം ചെയ്തവരെ മറ്റ് ആശുപത്രിയിലേക്ക് മാറ്റണം. മേൽവിലാസവും ബന്ധുക്കളുമുള്ള രോഗികളെ കൈമാറാൻ നിയമസഹായം തേടണം.

കെ.എൻ.നാരായണൻ
എച്ച്. ഡി.എസ്. എംപ്ലോയീസ് കോൺഗ്രസ് പ്രസിഡന്റ്