കൈകളിൽ വാളേന്തി റോബോട്ടുകളുടെ നൃത്തം: അമ്പരന്ന് കാണികൾ, വീഡിയോ വൈറൽ

റിയാ‌ദ്: സൗദി അറേബ്യയുടെ പരമ്പരാഗത വാൾനൃത്തമായ 'അർദ' അവതരിപ്പിച്ച് അതിഥികളെ അമ്പരിപ്പിച്ച് ചൈനീസ് ഹ്യൂമനോയിഡ് റോബോട്ടുകൾ. പരമ്പരാഗത സൗദി വസ്ത്രമണിഞ്ഞ റോബോട്ടുകളുടെ ഈ വേറിട്ട നൃത്തപ്രകടനത്തിന്റെ വീഡിയോ സോഷ്യൽ മീഡിയയിൽ വൈറലാകുകയാണ്.

ചൈനീസ് എംബസി റിയാദിലെ കൾച്ചറൽ പാലസിൽ സംഘടിപ്പിച്ച സ്വീകരണച്ചടങ്ങിലാണ് റോബോട്ടുകളുടെ നൃത്തപ്രകടനം നടന്നത്. സൗദിയുടെ പരമ്പരാഗത വസ്ത്രങ്ങളായ തോബും ഗുത്രയും ധരിച്ചാണ് റോബോട്ടുകൾ വേദിയിലെത്തിയത്. കൈകളിൽ വാളുകളേന്തി നൃത്തം ചെയ്യുന്ന റോബോട്ടുകളെ വീഡിയോയിൽ കാണാം.

ചടങ്ങിൽ സൗദി, ചൈനീസ് ഉദ്യോഗസ്ഥർ ഉൾപ്പെടെയുള്ള പ്രമുഖർ പങ്കെടുത്തു. റിയാദ് റീജിയൻ മേയർ പ്രിൻസ് ഫൈസൽ ബിൻ അബ്ദുൽ അസീസ് ബിൻ അയ്യാഫും സൗദിയിലെ ചൈനീസ് അംബാസഡർ ചാംഗ് ഹുവയും ചടങ്ങിനെത്തിയിരുന്നു. ചാംഗ് ഹുവ വീഡിയോ എക്സിൽ പങ്കുവയ്ക്കുകയും റോബോട്ടുകളുടെ പ്രകടത്തെ പ്രശംസിക്കുകയും ചെയ്തു.

വീഡിയോ വൈറലായതിന് പിന്നാലെ റോബോട്ടുകളുടെ അസാമാന്യ പ്രകടനത്തെ പ്രശംസിച്ച് നിരവധിപേരാണ് രംഗത്തെത്തിയത്. അതേസമയം ഇനി നൃത്തം പോലുള്ള കലകൾക്ക് വേണ്ടിയും റോബോട്ട് വരുമോയെന്ന ആശങ്ക പ്രകടിപ്പിച്ചും ചിലർ രംഗത്തെത്തി.