പ്രായപൂർത്തി വോട്ടവകാശം ആദ്യം കൊച്ചിയിൽ

കൊച്ചി: രാജ്യത്ത് ആദ്യമായി പ്രായപൂർത്തി വോട്ടവകാശം നടപ്പായത് കൊച്ചിയിൽ. 1948 സെപ്തംബറിൽ കൊച്ചി നാട്ടുരാജ്യത്തിലായിരുന്നു പ്രായപൂർത്തി വോട്ടവകാശപ്രകാരം തിരഞ്ഞെടുപ്പ്. കൊച്ചിരാജ്യ പ്രജാമണ്ഡലത്തിനായിരുന്നു ഭൂരിപക്ഷം. എസ്. നീലകണ്ഠയ്യർ പ്രസിഡന്റും വി.ആർ. കൃഷ്ണനെഴുത്തച്ഛൻ ജനറൽ സെക്രട്ടറിയുമായ ഈ കക്ഷി മുമ്പ് ഭൂരിപക്ഷം ലഭിച്ചിട്ടും പ്രതിപക്ഷത്തിരുന്ന് ചരിത്രം രചിച്ചവരാണ്. 1948ൽ ഇക്കണ്ടവാര്യർ പ്രധാനമന്ത്രിയായി സർക്കാരുണ്ടാക്കി. 1949 ജൂൺ 30വരെ ഈ സർക്കാർ നിലനിന്നു. തിരുവിതാംകൂർ-കൊച്ചി സംയോജനത്തെത്തുടർന്ന് തിരു-കൊച്ചി അസംബ്ലി നിലവിൽ വന്നപ്പോൾ ഇക്കണ്ടവാര്യർ സ്ഥാനമൊഴിഞ്ഞു. പിന്നാലെ ടി.കെ. നാരായണപിള്ളയുടെ നേതൃത്വത്തിൽ 178 അംഗ കൊച്ചി-തിരുവിതാംകൂർ സംയുക്ത നിയമസഭ നിലവിൽവന്നു. പ്രജാമണ്ഡലം കോൺഗ്രസിന്റെ ഭാഗവുമായി.

കൊച്ചിരാജ്യ

പ്രജാമണ്ഡലം

ഉത്തരവാദഭരണം,ഖാദിപ്രചാരണം,മദ്യവിരുദ്ധ പ്രചാരണം എന്നീ ലക്ഷ്യങ്ങളോടെ തൃശൂർ മണികണ്ഠനാൽത്തറയിൽ 1941 ഫെബ്രുവരി ഒമ്പതിനാണ് കൊച്ചിരാജ്യ പ്രജാമണ്ഡലം രൂപീകരിച്ചത്. കോൺഗ്രസ് നേതാക്കളായ പനമ്പിള്ളി ഗോവിന്ദമേനോൻ,കെ. കരുണാകരൻ,കുറൂർ നീലകണ്ഠൻ നമ്പൂതിരിപ്പാട് എന്നിവരായിരുന്നു സാരഥികൾ.