ലോഗിൻ ടു സ്കൂൾ ആഘോഷമായി പ്രവേശനോത്സവം

കൊച്ചി: കൈനിറയെ മിഠായിയും മധുരപലഹാരങ്ങളുമായി കാത്തുനിന്നിരുന്ന അദ്ധ്യാപകരുടെ മുന്നിലേക്ക് വർണക്കുടകളും പുത്തൻ ബാഗുകളുമായി കുട്ടിക്കൂട്ടമെത്തി. മാതാപിതാക്കളുടെ കൈപിടിച്ച് പുഞ്ചിരിച്ചും ചിണുങ്ങിക്കരച്ചുമായിരുന്നു സ്കൂളിലേക്കുള്ള ആദ്യ വരവ്. ചെണ്ടമേളവും കാർട്ടൂൺ കഥാപാത്രങ്ങളും പ്രവേശനോത്സവത്തിന് മാറ്റുകൂട്ടി. രണ്ടുമാസത്തെ മദ്ധ്യവേനൽ അവധി കഴിഞ്ഞ് എത്തിയവരെയും വിദ്യാലയത്തിലേക്ക് ആദ്യമായി ചുവടുവെച്ച കുരുന്നുകളെയും സ്വീകരിക്കാൻ വർണാഭമായാണ് സ്‌കൂളുകൾ ഒരുങ്ങിയത്.

ജില്ലാ, ഉപജില്ലാ, സ്‌കൂൾ തലങ്ങളിൽ വിപുലമായ പരിപാടികളോടെ പ്രവേശനോത്സവം സംഘടിപ്പിച്ചു. പേഴയ്ക്കാപ്പിള്ളി ഗവ. ഹയർ സെക്കൻഡറി സ്‌കൂളിൽ നടന്ന എറണാകുളം ജില്ലാതല പ്രവേശനോത്സവത്തിൽ വർണക്കടലാസ് തൊപ്പിയും പൂക്കളും നൽകിയാണ് കുട്ടികളെ ക്ലാസുകളിലേക്ക് സ്വീകരിച്ചത്. പൂമാലകളും തോരണങ്ങളും കൊണ്ട് വിദ്യാലയങ്ങൾ അലങ്കരിച്ചിരുന്നു. മഴ മാറിനിന്ന തെളിഞ്ഞ അന്തരീക്ഷം പ്രവേശനോത്സവം കൂടുതൽ മനോഹരമാക്കി.

മുൻവർഷങ്ങളെ അപേക്ഷിച്ച് കരച്ചിലുമായി എത്തിയ കുട്ടികളുടെ എണ്ണം കുറവായിരുന്നു. കരഞ്ഞവരാകട്ടെ സമ്മാനങ്ങൾ ലഭിച്ചതോടെ സന്തോഷത്തിലായി. കുട്ടികൾക്കായി വിവിധ കലാപരിപാടികൾ സ്‌കൂളുകളിൽ ഒരുക്കിയിരുന്നു. പഠനോപകരണങ്ങളുടെ വിതരണവും നടന്നു. ഇനി അറിവിന്റെ പുതിയ അദ്ധ്യയനകാലം.

സ്‌കൂൾ വികസനത്തിൽ വിവേചനം
പാടില്ല: മന്ത്രി അനൂപ് ജേക്കബ്

മൂവാറ്റുപുഴ: അടിസ്ഥാന സൗകര്യ വികസനത്തിൽ വിവേചനമില്ലാത്ത സമീപനമാണ് ഉണ്ടാകേണ്ടതെന്ന് മന്ത്രി അനൂപ് ജേക്കബ് പറഞ്ഞു. കുട്ടികളുടെ എണ്ണം നോക്കിയല്ല, മറിച്ച് പൊതുവിദ്യാലയങ്ങളുടെ ആവശ്യകത പരിഗണിച്ചാണ് വികസന ഫണ്ടുകൾ അനുവദിക്കേണ്ടതെന്ന് അദ്ദേഹം വ്യക്തമാക്കി. പേഴയ്ക്കാപ്പിള്ളി ഗവ. ഹയർ സെക്കൻഡറി സ്‌കൂളിൽ എറണാകുളം ജില്ലാതല സ്‌കൂൾ പ്രവേശനോത്സവം ഉദ്ഘാടനം ചെയ്യുകയായിരുന്നു അദ്ദേഹം. പ്രവേശനോത്സവ സപ്ലിമെന്റും, ജില്ലാ ശുചിത്വമിഷൻ പുറത്തിറക്കിയ ശുചിത്വ സന്ദേശങ്ങൾ അടങ്ങിയ നെയിംസ്ലിപ്പുകളും മന്ത്രി പ്രകാശനം ചെയ്തു. എസ്.എസ്.എൽ.സി പരീക്ഷയിൽ മുഴുവൻ എ പ്ലസ് നേടിയ കുട്ടികളെയും, സംസ്ഥാന പൊതുവിദ്യാഭ്യാസ വകുപ്പ് നടത്തിയ സ്‌കോളർഷിപ്പ് പരീക്ഷകളിൽ വിജയികളായ വിദ്യാർത്ഥികളെയും ആദരിച്ചു. എം. മാത്യു കുഴൽനാടൻ എം.എൽ.എ അദ്ധ്യക്ഷനായി. എറണാകുളം ജില്ലാ പഞ്ചായത്ത് പ്രസിഡന്റ് കെ.ജി. രാധാകൃഷ്ണൻ മുഖ്യപ്രഭാഷണം നടത്തി. ജില്ലാ പഞ്ചായത്ത് അംഗം മാത്യൂസ് വർക്കി പഠനോപകരണങ്ങൾ വിതരണം ചെയ്തു.

ബഡ്‌സ് സ്കൂളിലും ഗംഭീരമായി

പ്രവേശനോത്സവം

കളമശേരി: എറണാകുളം കുടുംബശ്രീ ജില്ലാ മിഷന്റെ നേതൃത്വത്തിൽ പ്രവർത്തിക്കുന്ന ബഡ്‌സ് സ്കൂളുകളിലും പ്രവേശനോത്സവം ഗംഭീരമായി നടന്നു. ജില്ലാതല പ്രവേശനോത്സവം ഏലൂർ നഗരസഭയിലെ ബഡ്‌സ് സ്‌പെഷ്യൽ സ്‌കൂളിൽ സംഘടിപ്പിച്ചു. ബൗദ്ധിക വെല്ലുവിളികൾ നേരിടുന്ന കുട്ടികളുടെയും യുവജനങ്ങളുടെയും വിദ്യാഭ്യാസ, സാമൂഹിക ഉൾച്ചേരൽ പ്രവർത്തനങ്ങൾക്ക് തുടക്കമിടുന്നതിന്റെ ഭാഗമായാണ് പ്രവേശനോത്സവം നടത്തിയത്. മന്ത്രി വി.ഇ. അബ്ദുൾ ഗഫൂർ ഉദ്ഘാടനം ചെയ്തു. ഏലൂർ നഗരസഭാ ചെയർപേഴ്‌സൺ ലൈജി സജീവൻ അദ്ധ്യക്ഷയായി.