ഏറത്ത് മാടൻനടയിൽ കുഴിയേത്,​ റോഡേത്...

ചിറയിൻകീഴ്: അഴൂർ കുഴിയം കയർ സംഘം - ഏറത്ത് മാടൻനട റോഡ്. പേര് പറയുമ്പോൾ അടിപൊളിയൊരു റോഡായിരിക്കും പ്രതീക്ഷിക്കുന്നത്. എന്നാൽ ചെന്ന് പെട്ടാൽ നടുവൊടിഞ്ഞതു തന്നെ.

വർഷം 2026 ആണെങ്കിലും,​ ഈ റോഡ് ഇതുവരെ ടാർ കണ്ടിട്ടില്ല. ചെമ്മൺ പാതയാണ്. വേനൽക്കാലത്ത് പൊടി ശല്യം, ​മഴയായാൽ റോഡ് ചെളിക്കുളമാകും. കുഴി നിറഞ്ഞ റോഡിൽ മഴവെള്ളം നിറയുന്നതോടെ ഇരുചക്ര - കാൽനടയാത്രക്കാർ അപകടത്തിൽപ്പെടുന്നത് നിത്യസംഭവമാണ്.

റോഡ് ഗതാഗത യോഗ്യമാക്കണമെന്നാവശ്യം ശക്തമാണ്.

പെരുങ്ങുഴി ആറാട്ട് കടവ് മുതൽ കുഴിയം കയർ സംഘം വരെ നിലവിൽ ടാറിട്ട റോഡുണ്ട്. ഏറെ നാളത്തെ കാത്തിരിപ്പിനും പരാതിക്കും പരിവട്ടത്തിനും ഒടുവിലാണ്

ഈ റോഡിനെ ബന്ധിപ്പിച്ച് കുഴിയം കയർ സംഘം - ഏറത്ത് മാടൻനട റോഡ് നിർമ്മിച്ചത്. എന്നാൽ റോഡ് ആധുനിക രീതിയിൽ ഇതുവരെ നവീകരിച്ചിട്ടില്ല. എത്രയും വേഗം റോഡ് ടാർ ചെയ്യണമെന്നാണ് യാത്രക്കാരുടെ ആവശ്യം.

ജില്ലാപഞ്ചായത്ത് 2019 - 20 വാർഷിക പദ്ധതിയിൽ ഉൾപ്പെടുത്തിയും മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയിൽ ഉൾപ്പെടുത്തിയുമാണ് ഇവിടെ റോഡ് നിർമ്മിച്ചത്

8 മീറ്റർ വീതിയിലാണ് ഈ റോഡ് നിർമ്മിച്ചിരിക്കുന്നതെങ്കിലും റോഡിന്റെ ഇരുവശങ്ങളിലും വള്ളിച്ചെടികളും പുല്ലും പടർന്നു കയറി പലയിടത്തും ചെമ്മൺപാത 2 മീറ്ററായി ചുരുങ്ങിയിരിക്കുകയാണ്.

അഴൂർ വലിയ വീട് ഭാഗത്ത് മഴവെള്ളപ്പാച്ചിലിന്റെ കുത്തൊഴുക്കിൽ റോഡിന്റെ ഒരു ഭാഗം മുഴുവൻ ഓട പോലെയായി മാറിയിരിക്കുകയാണ്.

പെരുങ്ങുഴി റെയിൽവേ ഗേറ്റിന് പടിഞ്ഞാറുവശം കായലിനാൽ ചുറ്റപ്പെട്ട് കിടക്കുന്ന പ്രദേശമാണ്. ചല്ലിമുക്ക്,ആറാട്ടുകടവ്,കുഴിയം കോളനി,പ്ലാവിന്റെമൂട് എന്നിവിടങ്ങളിലുള്ളവർക്ക് പെരുങ്ങുഴി റെയിൽവേഗേറ്റ് വിവിധ കാരണങ്ങളാൽ മണിക്കൂറുകളോളമോ ചിലപ്പോൾ ദിവസങ്ങളോ അടച്ചിടുമ്പോൾ പുറംലോകത്തേയ്ക്ക് കടക്കാനുള്ള ഏക റോഡാണിത്.