സി.പി.എം ഓഫീസി​ൽ ജാതി അധിക്ഷേപം, ‌‌ഓഫീസ് സെക്രട്ടറിയെ അധിക്ഷേപി​ച്ചത് മഹിളാനേതാവ്

തിരുവല്ല : സി.പി.എം തിരുവല്ല ഏരിയ കമ്മിറ്റി ഓഫീസ് സെക്രട്ടറിയും ബാലസംഘം സംസ്ഥാന കമ്മിറ്റി അംഗവുമായ രമ്യ ബാലനെതി​രെ മഹിളാ അസോസിയേഷൻ ഏരിയ പ്രസിഡന്റ് ഹൈമ സി പിള്ള ജാതി അധിക്ഷേപം നടത്തിയതായി പരാതി. ഈ മാസം 20ന് ഏരി​യ കമ്മി​റ്റി​ ഒാഫീസി​ൽ നടന്ന മഹിളാ അസോസിയേഷൻ യോഗത്തിലാണ് ജാതി അധിക്ഷേപം ഉണ്ടായത്. ഇതുസംബന്ധിച്ച് പാർട്ടി ഏരിയാ സെക്രട്ടറി ബിനിൽകുമാറിന് രേഖാമൂലവും ജില്ലാ സെക്രട്ടറി രാജു എബ്രഹാമിനെ ഫോണിൽ വിളിച്ചും പരാതി നൽകിയിരുന്നു. സംഭവത്തിൽ പട്ടികജാതി ക്ഷേമസമിതിയും പാർട്ടിക്ക് പരാതി നൽകിയിട്ടുണ്ട്. ഈ വിഷയം ചർച്ച ചെയ്യാനായി ജില്ലാ സെക്രട്ടറി രാജു എബ്രഹാമിന്റെ നേതൃത്വത്തിൽ ഏരിയ കമ്മിറ്റി ഓഫീസിൽ യോഗം വിളിച്ചുചേർത്ത് സമവായത്തിൽ പോകാൻ ആവശ്യപ്പെട്ടു. എന്നാൽ തീരുമാനം അംഗീകരിക്കാൻ കഴിയില്ലെന്നും സംസ്ഥാന സെക്രട്ടറി എം.വി.ഗോവിന്ദന് പരാതി നൽകുമെന്നും രമ്യ ബാലൻ പ്രതികരിച്ചു.