വെല്ലുവിളി നേരിടാൻ വേണം സ്വന്തം എ.ഐ: പ്രശാന്ത് ബാലകൃഷ്ണൻ

കൊച്ചി: എ.ഐ സാങ്കേതികവിദ്യ സ്വന്തമായി വികസിപ്പിക്കാതെ സൈബർസുരക്ഷ കൊണ്ട് മാത്രം ഭാവിയിലെ വെല്ലുവിളികളെ നേരിടാനാകില്ലെന്ന് ഗഗൻയാൻ മിഷൻ കമാൻഡറും എയർ കമ്മഡോറുമായ പ്രശാന്ത് ബാലകൃഷ്ണൻ നായർ പറഞ്ഞു. എഫ് 9 ഇൻഫോടെക് കേരള സ്റ്റാർട്ടപ്പ് മിഷനുമായി സഹകരിച്ച് കൊച്ചിയിൽ സംഘടിപ്പിച്ച സൈബർ സുരക്ഷാ സമ്മിറ്റിൽ പങ്കെടുക്കാൻ എത്തിയതായിരുന്നു അദ്ദേഹം.

നാളത്തെ യുദ്ധങ്ങളും വ്യവസായങ്ങളും നിയന്ത്രിക്കുന്നത് എ.ഐ ആയിരിക്കും. ലോകത്തിലെ ഭൂരിഭാഗം സോഫ്റ്റ്‌വെയർ ശൃംഖലകളും നയിക്കുന്നത് ഇന്ത്യക്കാരാണ്. ഈ കരുത്തിൽ വിശ്വസിച്ച് മുന്നോട്ടു പോകണമെന്നും അദ്ദേഹം മാദ്ധ്യമങ്ങളോട് പറഞ്ഞു.

സമ്മേളനം ഹൈബി ഈഡൻ എം.പി ഉദ്ഘാടനം ചെയ്തു. സൈബർസുരക്ഷാരംഗത്ത് ലോകത്താകമാനം 50 ലക്ഷത്തോളം ഒഴിവുകളാണുള്ളതെന്ന് വിജിലൻസ് ഡയറക്ടർ മനോജ് എബ്രഹാം പറഞ്ഞു. മികച്ച പ്രതിഭകളുള്ള കേരളത്തിന് അവസരങ്ങൾ പ്രയോജനപ്പെടുത്താൻ മുൻതൂക്കമുണ്ട്.