തലയ്ക്ക് അടിച്ചിട്ട് ഇരിക്കാൻ  പറയുന്നപോലെ :ജി.സുധാകരൻ

#സി.പി.എം തിരുത്തിന് പരിഹാസം

ആലപ്പുഴ: തെറ്റ്​ തിരുത്തുമെന്ന്​ പറഞ്ഞ സി.പി.എം കോഴിക്കോട്​ സമ്മേളനത്തിൽ പാർട്ടി സെക്രട്ടറിയെ മാറ്റാനാണ് നടപടി എടുക്കേണ്ടിയിരുന്നതെന്ന് ജി.സുധാകരൻ എം.എൽ.എ. സംസ്ഥാന സെക്രട്ടറി എം.വി.ഗോവിന്ദന് തലയ്ക്ക്​ ഒരടി കൊടുത്തിട്ട് അവിടെ ഇരിക്കാൻ പറയുന്നതു പോലെയാണ്​ തിരുത്തൽ. പാർട്ടിയിലുണ്ടായ അധഃപതനത്തിൽ നിന്ന് നേതൃത്വം കരകയറിയില്ലെന്ന് സുധാകരൻ കുറ്റപ്പെടുത്തി.ആലപ്പുഴയിൽ മാദ്ധ്യമങ്ങളോട് സംസാരിക്കുകയായിരുന്നു അദ്ദേഹം. പാർട്ടിവിട്ടു​പോയവരുടെ കൂട്ടത്തിൽ താൻ ഇല്ലെന്നാണ്​ സി.പി.എം ജനറൽ സെക്രട്ടറി എം.എ.ബേബി പറഞ്ഞത്. താൻ പാർട്ടി വിട്ടുപോയത് അവിടെ നിൽക്കാൻ കൊള്ളാത്തതുകൊണ്ടാണ്​.

വർഗമെന്താണെന്ന്​ അറിയാത്തവർ പോലും പൊളിറ്റ്​ ബ്യൂറോയിലുണ്ട്​. തിരഞ്ഞെടുപ്പുകളിലെ പരാജയത്തിൽ എം.വി ഗോവിന്ദൻ മാത്രമാണോ സമാധാനം പറയേണ്ടത്​. തന്നെ ചീത്ത പറഞ്ഞാൽ കേന്ദ്ര കമ്മിറ്റിയിലും പി.ബിയിലും എത്താമെന്ന് വിചാരിക്കുന്ന ചില ആളുകളുണ്ട്. 2020നുശേഷം പിണറായി വിജയൻ തന്നോട് മര്യാദ കാണിച്ചിട്ടില്ല. പാർട്ടിയിൽ പൊളിറ്റിക്കൽ ക്രിമിനലുകൾ വന്നശേഷമാണിത്. പിണറായി വിജയനെ കല്ലെറിയാനും ഇ.ഡിയെ തള്ളിപ്പറയാനും താനില്ല.

പാർട്ടിയിലേക്ക് അഴിമതിക്കാരും വൃത്തികെട്ടവരും കടന്നുവന്നിട്ടുണ്ട്​. ബേബിയുടെ പരിമിതികൾ തനിക്കറിയാം. അതിനാൽ അദ്ദേഹം സ്വന്തം കാര്യം നോക്കിയാൽ മതി. ​​​കൊള്ളയും അഴിമതിയും കാട്ടിയതിനാലാണ്​ റിപ്പോർട്ടർ ടി.വി ഓഫീസിൽ റെയ്​ഡ്​ നടത്തിയതെന്നും അവർ അനുഭവിക്കട്ടെയെന്നും അദ്ദേഹം പറഞ്ഞു.