ശാസന എനിക്ക് മാത്രമല്ല: എം.വി.ഗോവിന്ദൻ

കോഴിക്കോട് : മൂന്നു ദിവസം കോഴിക്കോട് നടന്ന സി.പി.എം വിപുലീകൃത സംസ്ഥാന സമിതി സർവത്ര തിരുത്തലോടെയാണ് അവസാനിച്ചത്. ശാസന, തലോടൽ, ചിവിട്ടി ഉഴിച്ചിൽ തുടങ്ങി പാർട്ടിയെ അടിമുടി അഴിച്ചു പണിയാനുള്ള നിർദ്ദേശമുണ്ടായി. സമിതിക്ക് ശേഷം സംസ്ഥാന സെക്രട്ടറി എം.വി.ഗോവിന്ദൻ കേരളകൗമുദിയോട് സംസാരിക്കുന്നു.

 ചവിട്ടി ഉഴിഞ്ഞത് സംസ്ഥാന സെക്രട്ടറിയെയാണോ..?

അതൊക്കെ നിങ്ങൾ മാദ്ധ്യമങ്ങളുടെ വിലയിരുത്തൽ. ഇക്കഴിഞ്ഞ തിരഞ്ഞെടുപ്പിൽ പാർട്ടിയെ തോൽപ്പിക്കാൻ ബഹുഭൂരിപക്ഷം മാദ്ധ്യമങ്ങളും കൂട്ട് നിന്നില്ലേ. ഈ പാർട്ടി ആരെയും പേടിക്കുന്നില്ല. പ്രത്യേകിച്ച് മാദ്ധ്യമങ്ങളെ. വർഷങ്ങളായി കൂടെ നിന്ന പാർട്ടി പ്രവർത്തകരോടും ജനത്തോടുമാണ് ഉത്തരവാദിത്വം. അവിടെ ആവശ്യമായ തിരുത്തലുണ്ടാകും. ഒരു ഉത്കണ്ഠയുമില്ല.

താങ്കളെ ശാസിച്ചെന്നാണല്ലോ ..?

അതാണ് ഞാൻ ആദ്യം പറഞ്ഞത്. വാർത്തകളല്ലേ. നിങ്ങൾക്ക് ഇഷ്ടം പോലെ കൊടുത്തോളൂ. സി.പി.എം എന്നു പറഞ്ഞാൽ ഒരു കുടുംബമാണ്. ശാസന എനിക്ക് മാത്രമല്ല, പലർക്കുമുണ്ടായിട്ടുണ്ട്. ഞാനാണല്ലോ നിങ്ങളുടെ ഇര. അപ്പോൾ തോന്നും പോലെ പറഞ്ഞോളൂ.

സെക്രട്ടറി എന്താണ് തിരുത്താൻ പോകുന്നത്...?

സെക്രട്ടറി എന്തു തിരുത്തുമെന്നല്ല. പാർട്ടി അടിമുടി തിരുത്തും. അതിനുള്ള ചർച്ചകളും തീരുമാനങ്ങളുമാണ് സമിതിയിലുണ്ടായത്. വിപുലീകൃത ജില്ലാ കമ്മിറ്റികൾ ചേരാൻ പോവുകയാണ്. ഒക്ടോബർ 18ന് മുമ്പ് പൂർത്തിയാവും. തുടർന്ന് വിപുലീകൃത ഏരിയ-ലോക്കൽ-ബ്രാഞ്ച് കമ്മിറ്റികളും ചേരും. നല്ല ഷാർപ്പായ വിമർശനങ്ങളും തിരുത്തലുമായിരിക്കും എല്ലായിടത്തും.

സ്വത്തു വിവരങ്ങളുടെ കാര്യത്തിലാണല്ലോ പ്രധാന വിമർശനം..?

പാർട്ടി മെമ്പറായ കാലം മുതലുള്ള സ്വത്തു വിവരങ്ങളുടെ പട്ടിക തയ്യാറാക്കും. ജനങ്ങൾക്കിടയിൽ പാർട്ടി മെമ്പർമാർ മാതൃകയാകണം. അവമതിപ്പുണ്ടാക്കുന്ന ഒരു പ്രവൃത്തിയും അനുവദിക്കില്ല.