കളിക്കളത്തിലെ തിരക്കുകൾക്കിടയിൽ സഞ്ജു മടങ്ങിയെത്തുന്ന ഇടം; കേരളത്തനിമയിൽ ആറുകോടിയുടെ വീട്

ഇന്ത്യൻ ക്രിക്കറ്റിലെ മലയാളി സാന്നിദ്ധ്യമായ സഞ്ജു സാംസണിന്റെ വെടിക്കെട്ട് ബാറ്റിംഗ് ഏറെ ചർച്ച ചെയ്യപ്പെട്ടിട്ടുണ്ടെങ്കിലും താരത്തിന്റെ കേരളത്തനിമ നിറഞ്ഞ വസതിയെക്കുറിച്ച് പലർക്കുമറിയില്ല. തിരുവനന്തപുരത്തുള്ള ആറുകോടിയോളം വിലവരുന്ന ആഡംബര വസതിക്കുറിച്ചുള്ള റിപ്പോർട്ടുകൾ ഇപ്പോൾ സമൂഹമാദ്ധ്യമങ്ങളിൽ ഏറെ ശ്രദ്ധേയമാണ്. കേരളീയ വാസ്തുവിദ്യയുടെ തനിമയും ആധുനിക സൗകര്യങ്ങളും ഒത്തുചേരുന്ന മനോഹരമായ ഇടമാണ് ഈ ബംഗ്ളാവ്. തടികൊണ്ടുള്ള അകത്തളങ്ങൾ, വിശാലമായ ബാൽക്കണി, പച്ചപ്പ് നിറഞ്ഞ പൂന്തോട്ടം, സ്വകാര്യ ജിം എന്നിവയാണ് ഈ വീടിന്റെ പ്രധാന സവിശേഷതകൾ.

തിരക്കേറിയ ക്രിക്കറ്റ് ജീവിതത്തിനൊപ്പം കുടുംബത്തോടൊപ്പം ശാന്തമായ ജീവിതം ആസ്വദിക്കാനാണ് ഇഷ്ടപ്പെടുന്നതെന്ന് താരം വെളിപ്പെടുത്തിയിട്ടുണ്ട്. ഭാര്യ ചാരുലത രമേശിനും മാതാപിതാക്കൾക്കുമൊപ്പം തിരുവനന്തപുരത്തെ വിഴിഞ്ഞത്തുള്ള വസതിയിലാണ് സഞ്ജു ഇടവേളകൾ ആഘോഷിക്കുന്നത്. കൂടാതെ മുംബയ്, ബംഗളൂരു, ഹൈദരാബാദ് എന്നിവിടങ്ങളിലും സഞ്ജുവിന് വീടുകളുള്ളതായി റിപ്പോർട്ടുകളുണ്ട്.

കേരളത്തനിമയും ആധുനിക വാസ്തുവിദ്യയും

കേരളത്തിന്റെ പരമ്പരാഗത ശൈലിക്കൊപ്പം ആധുനിക വാസ്തുവിദ്യയുമായി സമന്വയിപ്പിച്ചാണ് വീട് രൂപകല്പന ചെയ്തിരിക്കുന്നത്. . വിശാലമായ അകത്തളങ്ങളും ഓപ്പൺ സ്പേസുകളും നിറഞ്ഞ വീടിനുള്ളിൽ സ്വാഭാവികമായ വായുസഞ്ചാരം ഉറപ്പാക്കുന്ന രീതിയിലാണ് നി‌ർമാണം. ജ്യാമിതീയ രൂപങ്ങളിലുള്ള അലങ്കാരങ്ങളോടുകൂടിയ സ്റ്റെയിൻലെസ് സ്റ്റീൽ പ്രവേശനകവാടമാണ് വീടിന്റെ പുറംഭാഗത്തെ പ്രധാന ആകർഷണങ്ങളിലൊന്ന്. വലിയ ഗ്ലാസ് വാതിലുകളും തടി ഫ്രെയിമുകളുള്ള ജനലുകളും വീടിന് ലാളിത്യവും ആധുനിക ഭംഗിയും നൽകുന്നു. പുറത്തുനിന്ന് നോക്കുമ്പോൾ ലളിതമായി തോന്നുന്ന വീടിന്റെ അകത്തളങ്ങൾ കൂടുതൽ വിശാലവും ആകർഷകവുമാണ്.

ഇളം നിറത്തിലുള്ള അകത്തളങ്ങൾ

വീടിന്റെ ഇന്റീരിയറിൽ വെള്ള, ക്രീം, തവിട്ട് നിറങ്ങൾക്കാണ് പ്രാധാന്യം നൽകിയിരിക്കുന്നത്. ഈ നിറങ്ങളുടെ സംയോജനം മുറികൾക്ക് കൂടുതൽ വെളിച്ചവും വലിപ്പവും നൽകുന്നു. വരാന്തയിൽ വെള്ളയും ചാരനിറവും കലർന്ന മാർബിൾ തറയാണ് ഒരുക്കിയിരിക്കുന്നത്. സ്വീകരണമുറിയിലെ ക്രീം, തവിട്ട് നിറങ്ങളിലുള്ള സോഫകൾ പോസിറ്റീവ് എനർജി നിറയ്ക്കുന്നു. ആഡംബരത്തിന്റെ അതിപ്രസരമില്ലാതെ ലളിതമായ രീതിയിലുള്ള രൂപകല്പനയാണ് വീടിന്റെ പ്രത്യേകത.

പൂക്കളും ചെടികളും നിറഞ്ഞ മുറ്റം

വീടിന്റെ മുറ്റവും പൂന്തോട്ടവും കേരളീയ സംസ്കാരത്തിന്റെ അടയാളങ്ങൾ ഉൾക്കൊള്ളുന്ന രീതിയിലാണ് ഒരുക്കിയിരിക്കുന്നത്. പൂക്കൾ കൊണ്ടുള്ള രംഗോലികളും പരമ്പരാഗത പിച്ചള വിളക്കുകളും മുറ്റത്തിന് പ്രത്യേക ഭംഗി നൽകുന്നു. വരാന്തയുടെ വിവിധ ഭാഗങ്ങളിൽ ഉയരമുള്ള ചെടികൾ സ്ഥാപിച്ചിട്ടുണ്ട്. ബാൽക്കണിയിലേക്കു പടർന്നുകയറുന്ന വള്ളിച്ചെടികളും പച്ചപ്പും വീടിന്റെ പ്രകൃതിഭംഗി വർദ്ധിപ്പിക്കുന്നു.

രാജകീയ പ്രൗഢിയുള്ള അലങ്കാരങ്ങൾ

വീടിന്റെ അകത്തളങ്ങളിൽ തടി ഉപയോഗിച്ചുള്ള അലങ്കാരങ്ങൾക്കും പ്രത്യേക സ്ഥാനമുണ്ട്. മിനുസപ്പെടുത്തിയെടുത്ത ഇരുണ്ട തടികൾ ഉപയോഗിച്ച് നിർമിച്ചിരിക്കുന്ന പടികളും കൊത്തുപണികളുള്ള തൂണുകളും കൈവരികളും വീടിന് പഴമയുടെ പ്രൗഢി നൽകുന്നു. ആധുനിക രൂപകൽപ്പനയ്ക്കിടയിലും പരമ്പരാഗത ശൈലി നിലനിർത്താൻ ഇത്തരം ഘടകങ്ങൾ സഹായിക്കുന്നു. തടിയുടെ സ്വാഭാവിക ഭംഗി വീടിന്റെ ഇന്റീരിയർ ശൈലിയുമായി ചേർന്നുനിൽക്കുന്നു.

ഫിറ്റ്നസിനുമുണ്ട് സൗകര്യം

ക്രിക്കറ്റ് താരത്തിന്റെ ജീവിതത്തിൽ ശാരീരികക്ഷമതയ്ക്ക് വലിയ പ്രാധാന്യമുണ്ട്. പരിശീലനവും വ്യായാമവും പതിവിന്റെ ഭാഗമായതിനാൽ വീടിനുള്ളിൽത്തന്നെ സ്വകാര്യ ജിം ഒരുക്കിയിട്ടുണ്ട്. ആധുനിക വ്യായാമ ഉപകരണങ്ങൾ സജ്ജീകരിച്ച ഈ ജിം, തിരക്കേറിയ ക്രിക്കറ്റ് മത്സരങ്ങൾക്കും പരിശീലനത്തിനുമിടയിൽ വീട്ടിൽവച്ചുതന്നെ ഫിറ്റ്നസ് നിലനിർത്താൻ സഹായിക്കുന്നതാണ്.

തിരക്കിട്ട ജീവിതത്തിനിടയിലും കേരളത്തിന്റെ മൂല്യങ്ങളെ ചേ‌ർത്തുനിർത്താൻ മലയാളത്തിന്റെ അഭിമാനമായ സഞ്ജു സാംസൺ ഇഷ്ടപ്പെടുന്നുവെന്നതിന്റെ ഉത്തമ ഉദാഹരണമാണ് ആ വസതി.