ഇന്ന് ലോക നാടക ദിനം രാജുവിന്റെ നാടക ജീവിതം: 'ഒരു കുടുംബ കഥ'

പെരുമ്പാവൂർ: വെങ്ങോല പഞ്ചായത്തിലെ വാരിക്കാട് സ്വദേശിയായ സി.എ. രാജുവിന്റെ ജീവിതം നാടകവുമായി ഇഴചേർന്ന് കിടക്കുന്നു. ഒപ്പം കുടുംബാംഗങ്ങളും രാജുവിന്റെ നാടകത്തിൽ അരങ്ങിലെത്തുന്നു. രാജുവിന്റെ സ്വന്തം ട്രൂപ്പായ 'പെരുമ്പാവൂർ കളിയരങ്ങ് കലാസമിതി'യുടെ നാടകങ്ങളിൽ ഭാര്യ നീലയും മക്കളായ അമലും അഖിലും അഭിനയിക്കുന്നു.

നാടകത്തിനു പുറമേ, 'കന്നാസും കടലാസും', 'ബാംബു ബോയ്സ്' എന്നീ സിനിമകളിലും രാജു വേഷമിട്ടിട്ടുണ്ട്. എട്ട് വർഷം മുമ്പാണ് രാജു നാടകജീവിതം ആരംഭിച്ചത്. 'എന്റെ അമ്മയ്ക്ക്' എന്ന പെരുമ്പാവൂർ കളിയരങ്ങ് കലാസമിതിയുടെ നാടകത്തിൽ അഭിനയിച്ച നീലയെ രാജു തന്റെ ജീവിതസഖിയാക്കി. സിനിമാതാരം പോൾ വെങ്ങോലയുടെ സഹോദരൻ ബേബി വെങ്ങോല, സംഗീത നാടക അക്കാഡമി ജോയിന്റ് സെക്രട്ടറി എൽദോസ് യോഹന്നാൻ തുടങ്ങിയവർ രാജുവിന്റെ ട്രൂപ്പിലെ പ്രധാന അഭിനേതാക്കളാണ്.

രാജുവിന്റെ ട്രൂപ്പിന്റെ ആദ്യ നാടകമായ 'ഒറ്റപ്പെട്ടവരുടെ ശബ്ദം' ഇതിനോടകം 100 വേദികൾ പിന്നിട്ടു. 'എന്റെ അമ്മയ്ക്ക്' എന്ന രണ്ടാമത്തെ നാടകം 140-ലധികം വേദികൾ അവതരിപ്പിച്ചു. ഈ വർഷം സഹോദരൻ പ്രദീപ് നാട്ടരങ്ങ് സംവിധാനം ചെയ്യുന്ന 'സ്‌നേഹദീപം' എന്ന നാടകമാണ് ട്രൂപ്പ് അവതരിപ്പിക്കുന്നത്.

പുരസ്‌കാരങ്ങൾ:

1985-ൽ 'പട്ടിണിഗാഥ' എന്ന നാടകത്തിന് സംസ്ഥാന അവാർഡ് ലഭിച്ചു.

രണ്ടുതവണ കേരളോത്സവത്തിൽ മികച്ച നടനുള്ള അവാർഡ് നേടി.

പി.ജെ. ആന്റണിയുടെ പേരിൽ സംഘടിപ്പിച്ച നാടകമേളകളിലെ അഭിനയത്തിനും മികച്ച നടനുള്ള അവാർഡ് ലഭിച്ചു.

സഹപാഠികളുടെ ആദരം:

'നാടകമേ ജീവിതം' എന്നത് ജീവിതവ്രതമാക്കിയ രാജുവിനെയും കുടുംബത്തെയും വളയൻചിറങ്ങര ഹയർ സെക്കൻഡറി സ്‌കൂളിലെ 1984 എസ്.എസ്.എൽ.സി. ബാച്ചിലെ സഹപാഠികൾ ആദരിച്ചു. നാടകകലാകാരനെന്ന നിലയിൽ ലഭിച്ച വലിയ അംഗീകാരമാണിതെന്ന് രാജു പറഞ്ഞു.