പാരിപ്പള്ളി മെഡി. ആശുപത്രിയിൽ രോഗികളെ ക്യൂ നിറുത്തി കൊല്ലാക്കൊല!

എല്ലാ കൗണ്ടറുകളിലും പുലർച്ചെ മുതൽ ക്യൂ

ചാത്തന്നൂർ: പാരിപ്പള്ളി മെഡിക്കൽ കോളേജ് ആശുപത്രി​യി​ൽ എവി​ടെ നോക്കി​യാലും ക്യൂ തന്നെ ക്യൂ! അതി​ രാവി​ലെ എത്തി​ ഏതെങ്കി​ലും ക്യൂവി​ൽ ഇടം പി​ടി​ച്ചെങ്കി​ൽ മാത്രമേ ഉച്ചയോടെയെങ്കി​ലും കാര്യം സാധി​ച്ച് ഇറങ്ങാൻ കഴി​യൂ.

ദിവസവും ആയിരത്തി​ലേറെ രോഗി​കളാണ് ഒ.പി​യി​ൽ എത്തുന്നത്. പുലർച്ചെ ഒ പിയിൽ വന്ന് സെക്യുരിറ്റി നൽകുന്ന ടോക്കൺ സ്ലിപ്പുകളുമായി ഒ.പി കൗണ്ടറിൽ എത്തി ക്യു നിൽക്കണം. അവി​ടെ നി​ന്ന് കിട്ടുന്ന ഒ.പി ടിക്കറ്റുമായി തങ്ങൾക്ക് ആവശ്യമുള്ള

ഒ.പിയുടെ മുന്നിലെത്തി​ ഒ.പി കാർഡ് അകത്ത് കൊടുത്താൽ പിന്നെയും ക്യു നിന്ന് വേണം ഡോക്ടറെ കാണാൻ. സെക്യുരിറ്റി ജീവനക്കാർ വി​ളക്കി​ന്നുന്നതനുസരി​ച്ച് കയറി​ ഡോക്ടറെ കാണണം. ഡോക്ടർ കുറിച്ച് നൽകുന്ന മറ്റ് പരിശോധനകൾക്കായി എല്ലായിടത്തും പി​ന്നെയും ക്യു നിൽക്കണം. എക്സ് റേ, രക്തപരിശോധന, ഇ.സി.ജി തുടങ്ങി ക്യാഷ് കൗണ്ടറി​നു മുന്നി​ൽ വരെ ക്യൂ നി​ൽക്കാതെ രക്ഷയി​ല്ല.

കഷ്ടപ്പെട്ട് വാങ്ങുന്ന റിസൾട്ടുമായി വീണ്ടും ഡോക്ടറെ കാണാൻ എത്തുമ്പോൾ ഡോക്ടർ ഒ.പി കഴിഞ്ഞ് പോയിട്ടുണ്ടാവും. വീണ്ടും അടുത്ത ദിവസം രോഗി സമാനമായ ക്യു നിന്ന് ഡോക്ടറെ കാണേണ്ട അവസ്ഥയാണ്. ഓപ്പറേഷനു വേണ്ടി​ എത്തുന്ന രോഗികൾക്ക് ഒന്നിലധികം ഡോക്ടർമാരെ കാണണം എന്നുണ്ടെങ്കിൽ ദിവസങ്ങൾ എടുക്കും. ഏതെങ്കി​ലും ഭാഗ്യത്തി​ന്, എല്ലാം റെഡി​യായി​ മരുന്നു വാങ്ങാൻ ഫാർമസി​ക്കു മുന്നി​ലെത്തി​യാൽ അവി​ടെ വലി​യ ക്യൂവി​ൽ പൊരുതേണ്ടി​ വരും! ക്യൂ കടമ്പ കടന്ന് മുന്നിലെത്തി ചീട്ട് നീട്ടുമ്പോഴാവും 'ഈ മരുന്ന് ഇവിടെയില്ല' എന്ന മറുപടി ലഭിക്കുന്നത്.

പ്രായമുള്ള രോഗികൾ ആണ് കൂടുതലായും വലയുന്നത്. കിടപ്പ് രോഗികളെ കൊണ്ടുവന്നാൽ മണിക്കൂറുകൾ സ്‌ട്രച്ചറിലും വീൽ ചെയറുകളിലും ആശുപത്രി വരാന്തയിൽ കിടക്കേണ്ട അവസ്ഥയാണ്.

 കൈയൂക്കുള്ളവർ കാര്യക്കാർ

ആശുപത്രി ജീവനക്കാരിൽ സ്വാധീനമുണ്ടെങ്കിൽ ഒരു ക്യൂവിലും നിൽക്കാതെ കാര്യങ്ങൾ സാധിക്കാമെന്ന ആരോപണവുമുണ്ട്. ഒരു സ്ളിപ്പ് പോലും കയ്യിൽ വേണ്ട. ക്യൂ നിൽക്കുന്നവരുടെ വശത്തു കൂടി കൂളായി ചെന്ന് ഡോക്ടറെ കാണാം. സെക്യൂരിറ്റി ജീവനക്കാരാണ് പ്രധാനമായും ഇത്തരം 'ദർശന'ങ്ങൾക്ക് വഴിയൊരുക്കുന്നത്. ഇത് പലപ്പോഴും വഴക്കുകൾക്കും സംഘർഷങ്ങൾക്കും കാരണമായിട്ടുണ്ട്. കാർഡിയോളജി അടക്കമുള്ള സ്പെഷ്യാലിറ്റി ഒ.പി ഉള്ള ദിവസം എത്ര രാവിലെ ചെന്നാലും ഒന്ന് മുതൽ അൻപത് വരെയുള്ള ടോക്കൺ സ്ലിപ്പുകൾ കിട്ടില്ല ഈ സ്ലിപ്പുകൾ ആശുപത്രി ജീവനക്കാർ അവരുടെ വേണ്ടപ്പെട്ടവർക്കായി മാറ്റിവച്ചിരിക്കുകയാണെന്നാണ് പരാതി.

വേണം ഇളക്ട്രോണിക് ടോക്കൺ

 ക്യൂ നിയന്ത്രിക്കാനുള്ള ആധുനിക ഡിജിറ്റൽ സംവിധാനം

 പാരിപ്പള്ളി മെഡി. ആശുപത്രിയിൽ ഇത് അനിവാര്യം

 നീണ്ട വരികളിൽ കാത്തുനിൽക്കുന്നത് ഒഴിവാക്കാം

 സേവനങ്ങൾ കൂടുതൽ വേഗത്തിലാക്കാം

 രോഗിക്ക് സമയബന്ധിതമായി ഡോക്ടറെ കണ്ട് ചികിത്സ തേടാം

 കിയോസ്‌ക് മെഷീനിൽ നിന്ന് ആവശ്യമുള്ള സേവനം തിരഞ്ഞെടുക്കാം

 ഡിജിറ്റൽ ടോക്കൺ നമ്പർ വഴി ക്യു ഒഴിവാക്കി ഡോക്ടറെ കാണാം