കോട്ടയം മെഡിക്കൽ കോളേജ് തകരാർ പരിഹരിച്ചു, റേഡിയേഷൻ മെഷീൻ പ്രവർത്തനസജ്ജം

കോട്ടയം: കാൻസർ രോഗികൾക്ക് ആശ്വാസ നിമിഷം. കോട്ടയം മെഡിക്കൽ കോളേജ് ആശുപത്രിയിലെ തകരാറിലായ റേഡിയേഷൻ മെഷീൻ വീണ്ടും പ്രവർത്തനസജ്ജമായി. രണ്ട് മെഷീനുകളിൽ ഒന്ന് തകരാറിലായതോടെ ചികിത്സാ ക്രമീകരണങ്ങളിൽ പ്രതിസന്ധിയുണ്ടാകുമെന്ന ആശങ്കയുണ്ടായിരുന്നു. എന്നാൽ. മെഡിക്കൽ കോളേജ് അധികൃതരും മെഷീന്റെ പരിപാലന ചുമതലയുള്ള കമ്പനി അധികൃതരും നടത്തിയ ചർച്ചകൾക്കൊടുവിൽ അറ്റകുറ്റപ്പണി പൂർത്തിയാക്കി ഇന്നലെ രാവിലെ പ്രവർത്തനം പുനരാരംഭിച്ചു. കഴിഞ്ഞ വെള്ളിയാഴ്ചയാണ് മെഷീനുകളിൽ ഒന്ന് പ്രവർത്തനരഹിതമായത്. ഒരു മെഷീനിൽ പ്രതിദിനം അമ്പതോളം രോഗികൾക്കാണ് റേഡിയേഷൻ ചികിത്സ നൽകുന്നത്. മെഷീനുകളുടെ വാർഷിക പരിപാലന കരാർ തുകയായ രണ്ടുകോടി രൂപയോളം രണ്ടുവർഷമായി കുടിശികയായതാണ് അറ്റകുറ്റപ്പണി വൈകുന്നതിന് കാരണമായത്.

ഇനി തടസങ്ങളില്ല

രണ്ട് മെഷീനുകളും പ്രവർത്തനസജ്ജമായതോടെ കാൻസർ രോഗികൾക്ക് തടസമില്ലാതെ റേഡിയേഷൻ ചികിത്സ ലഭ്യമാക്കാനുള്ള സാഹചര്യം വീണ്ടുമൊരുങ്ങി. കുടിശികയും പരിപാലനവുമായി ബന്ധപ്പെട്ട പ്രതിസന്ധി നിലനിൽക്കുന്നതിനിടെയാണ് അധികൃതർ കമ്പനിയുമായി ചർച്ച നടത്തി പ്രശ്നപരിഹാരത്തിന് വഴിയൊരുക്കിയത്.