സ്വയം ആധാരമെഴുതാൻ മടിച്ച് ജില്ല

മലപ്പുറം: പൊതുജനങ്ങൾക്ക് ആധാരം സ്വയം എഴുതാമെന്ന സർക്കാർ ഉത്തരവ് പ്രകാരം ഒമ്പത് വർഷത്തിനിടെ ജില്ലയിൽ രജിസ്റ്റർ ചെയ്തത് 251 ആധാരങ്ങൾ മാത്രം. കഴിഞ്ഞ വർഷം 70 പേർ മാത്രമാണ് അവസരം പ്രയോജനപ്പെടുത്തിയത്. രജിസ്ട്രേഷൻ ഓഫീസുകളിലെ അഴിമതിയും ആധാരമെഴുത്തിലെ അമിത ഫീസ് തടയലും രജിസ്‌ട്രേഷൻ നടപടികൾ സുതാര്യമാക്കാനും ലക്ഷ്യമിട്ട് 2016ൽ ആണ് സംസ്ഥാന സർക്കാർ പ്രത്യേക ഉത്തരവിറക്കിയത്. ഇപ്പോഴും ജില്ലയിൽ രജിസ്റ്റർ ചെയ്യുന്ന ആധാരങ്ങളിൽ ഒരുശതമാനം പോലും പൊതുജനങ്ങളാൽ എഴുതപ്പെടുന്നവയല്ല. ആധാരം എഴുത്തുകാർ, വക്കീലന്മാർ മുഖേനെയാണ് ഭൂരിഭാഗം ആധാരങ്ങളും എഴുതുന്നത്.

ആധാരങ്ങൾ എഴുതുന്ന ഭാഷ സംബന്ധിച്ച അവ്യക്തതയും സ്വയം എഴുതിയാൽ തെറ്റുകൾ സംഭവിക്കുമോ എന്ന ഭയവുമാണ് മിക്കവരേയും ഇതിൽ നിന്ന് പിന്നോട്ടടിപ്പിക്കുന്നത്. ആധാരത്തിൽ തെറ്റുകൾ സംഭവിച്ചാൽ പിഴയാധാരം എഴുതേണ്ടിവരും. എന്നാൽ സാമ്പിൾ കോപ്പി പരിശോധിച്ച് തെറ്റ് തിരുത്തി തരേണ്ട ഉത്തരവാദിത്വം സബ് രജിസ്ട്രാർ ഓഫീസിലെ ഉദ്യോഗസ്ഥർക്കുണ്ട്. ഇതിന് കാണിക്കുന്ന വിമുഖതയും തിരിച്ചടിയാണ്. സ്വയംഎഴുതിയ ആധാരങ്ങൾക്ക് നിയമ സാധുതയില്ലെന്ന വ്യാജപ്രചാരണത്തിൽ വീണ് പോവുന്നവരും ഏറെയുണ്ട്. സർക്കാർ സീലും സ്റ്റാമ്പും പതിപ്പിക്കുന്നതോടെ പ്രമാണങ്ങൾക്ക് നിയമ സാധുത കൈവരും.

ആധാരം എഴുത്ത് എളുപ്പം

• ആധാരം സ്വയം തയ്യാറാക്കുന്നതിനുള്ള ലളിതമായ മാതൃക രജിസ്‌ട്രേഷൻ ഡിപ്പാർട്ട്‌മെന്റിന്റെ www.keralaregistration.gov.in വെബ്‌സൈറ്റിൽ ലഭ്യമാണ്.
• 19 മാതൃകാ പ്രമാണങ്ങൾ സർക്കാർ പുറത്തിറക്കിയിട്ടുണ്ട്. ആർക്കും മനസിലാവുന്ന ലളിതമായ ഭാഷയിലാണ് ഇവ പ്രസിദ്ധീകരിച്ചിട്ടുള്ളത്.
• ഇഷ്ടധാനം, ജന്മതീരാധാരം, കാണാധാരം, ധനനിശ്ചയ ആധാരം, ഭാഗപത്രം, പാട്ടാധാരം തുടങ്ങിയവ എഴുതാനുള്ള മാതൃകാപ്രമാണങ്ങൾ വെബ് സൈറ്റിലുണ്ട്. ഇതിൽ നിന്ന് ആവശ്യമുള്ള മാതൃകയുടെ പ്രിന്റെടുത്ത് പൂരിപ്പിച്ച് നൽകേണ്ട കാര്യമേയുള്ളൂ.
• സങ്കീർണ്ണവും പഴഞ്ചൻ ഭാഷൈ ശൈലിയും തീർത്തും ഒഴിവാക്കിയുള്ള ഇത്തരം ആധാരങ്ങൾ എഴുതാൻ എളുപ്പമാണ്. ഇക്കാര്യം മിക്കവർക്കും അറിയില്ല എന്നതും ആധാരം സ്വയം എഴുതാനുള്ള വഴി അടയ്ക്കുന്നുണ്ട്.
• പത്ത് ലക്ഷം രൂപയുള്ള വസ്തുവിന്റെ ആധാരം എഴുതാൻ പതിനായിരം രൂപയെങ്കിലും ഈടാക്കുന്നുണ്ട്. ഭൂമി രജിസ്റ്റർ ചെയ്യാൻ സർക്കാരിന് നൽകേണ്ട തുക, മുദ്രപേപ്പർ, സ്റ്റാമ്പ് ചാർജ്ജുകൾ എന്നിവയ്ക്ക് പുറമെ ആണ് ഈ അധിക ഫീസ്.