ഉപയോഗിക്കാത്ത കെട്ടിടത്തിൽ സൗരോർജ പാനൽ സ്ഥാപിച്ചു: ഫണ്ട് തട്ടാനെന്ന് പരാതി

കാളികാവ്: കാടുമൂടി നശിക്കുന്ന പുന്നക്കാട് ഗവ. ആയുർവേദ ആശുപത്രി കെട്ടിടത്തിന് മുകളിൽ സൗരോർജ്ജ പാനൽ സ്ഥാപിച്ച നിലയിൽ.

പുന്നക്കാട് മിനി സ്റ്റേഡിയത്തിനോട് ചേർന്നുള്ള കാടുമൂടിയ കെട്ടിടത്തിന് മുകളിലാണ് സൗരോർജ്ജ പാനൽ പുതിയതായി സ്ഥാപിച്ചിട്ടുള്ളത്. എം.എൽ.എ ഫണ്ടിൽ നിന്ന് 25 ലക്ഷം രൂപ ചെലവഴിച്ച് 2019ലാണ് കെട്ടിടം നിർമ്മിച്ചത്. വാടകക്കെട്ടിടത്തിൽ പ്രവർത്തിക്കുന്ന ആയുർവേദ ആശുപത്രിയുടെ പ്രവർത്തനം ഇതുവരെ പുതിയ കെട്ടിടത്തിലേക്ക് മാറ്റിയിട്ടില്ല. കാടുമൂടിയ നിലയിലുള്ള കെട്ടിടത്തിന് മുകളിൽ സൗരോർജ പാനലുകൾ സ്ഥാപിച്ചത് കണ്ട് ആളുകൾ അമ്പരന്നിരിക്കുകയാണ്.

ഉപയോഗമില്ലെങ്കിലും മുറയ്ക്ക് ഫണ്ടുണ്ട്

• ഉപയോഗമില്ലാത്ത കെട്ടിടത്തിൽ സൗരോർജ്ജ പാനലുകൾ സ്ഥാപിച്ചത് ഫണ്ട് ദുരുപയോഗം ചെയ്യാനാണെന്ന പരാതി ഉയർന്നിട്ടുണ്ട്.
• കെട്ടിടത്തിന്റെ ചുറ്റുമതിലും അനുബന്ധ സൗകര്യങ്ങളും ഒരുക്കാൻ
• പഞ്ചായത്ത് അഞ്ച് ലക്ഷം രൂപ ഈ വർഷം അനുവദിച്ചിട്ടുമുണ്ട്.
• ഫണ്ട് ചെലവിടുകയല്ലാതെ കെട്ടിടം ഉപയോഗപ്രദമാക്കാനുള്ള നടപടി ഉണ്ടായിട്ടില്ല.
• വിപുലമായ സൗകര്യങ്ങളോടെ ഒരുക്കിയ കെട്ടിടം സാമൂഹിക വിരുദ്ധരുടെ താവളമായി മാറിയിട്ടുണ്ട്.
• തെരുവു പട്ടികളും ഇഴജന്തുക്കളും കൂടെ ഇവിടെ താവളം ആക്കിയിട്ടുണ്ടെന്നാണ് പ്രദേശവാസികൾ പറയുന്നത്.

സൗരോർജ പാനലുകൾ സ്ഥാപിച്ചത് അനർട്ടാണ്. പഞ്ചായത്ത് ഇതിന് ഫണ്ട് ചെലവഴിച്ചിട്ടില്ല. സർക്കാർ സ്ഥാപനങ്ങൾ സൗരോർജ്ജവത്കരിക്കുന്നതിന്റെ ഭാഗമായിട്ടാണ് പദ്ധതി നടപ്പിലാക്കിയത്. പഞ്ചായത്ത് അനുവാദം നൽകുക മാത്രമാണ് ചെയ്തത്.

മഠത്തിൽ ലത്തീഫ് , വൈസ് പ്രസിഡന്റ്