പരശുറാം എക്സ്‌പ്രസിൽ ഇനി എൽ.എച്ച്.ബി കോച്ചുകൾ

പാലക്കാട്: കേരളത്തിലെ പ്രധാന ട്രെയിനുകളിലൊന്നായ മംഗളൂരു-കന്യാകുമാരി പരശുറാം എക്സ്‌പ്രസിൽ(നമ്പർ 16649/50) ഇനി മുതൽ എൽ.എച്ച്.ബി കോച്ചുകൾ. നിലവിലെ പരമ്പരാഗത കോച്ചുകൾക്കു പകരം യാത്രാക്കാർക്ക് കൂടുതൽ സുരക്ഷിതത്വവും യാത്രാസുഖവും നൽകുന്ന എൽ.എച്ച്.ബി കോച്ചുകൾ ഘടിപ്പിച്ച ട്രെയിൻ അടുത്തയാഴ്ച മുതലാണ് സർവീസ് നടത്തുക. മംഗളൂരു-കന്യാകുമാരി പരശുറാം എക്സ്‌പ്രസ്(16649) സെപ്തംബർ 22 മുതലും കന്യാകുമാരി-മംഗളൂരു പരശുറാം എക്സ്‌പ്രസ്(16650) സെപ്തംബ‌ർ 23 മുതലുമാണ് എൽ.എച്ച്.ബി കോച്ചുകളുമായി സർവീസ് നടത്തുക. 2 എ.സി ചെയർകാർ കോച്ച്, 9 സെക്കൻഡ് സിറ്റിംഗ് കോച്ച്, 9 ജനറൽ സെക്കൻഡ് ക്ലാസ് കോച്ച്, 1 സെക്കൻ‌ഡ് ക്ലാസ് കം ലഗ്ഗേജ് ബ്രേക്ക് വാൻ കോച്ച്, ഒരു ജനറേറ്റ‌ർ കോച്ച് എന്നിവയാണ് ട്രെയിനിലുണ്ടാവുക.

 സവിശേഷതകൾ

എൽ.എച്ച്.ബി കോച്ചുകളുടെ സസ്പെൻഷൻ സംവിധാനം വളരെ മികച്ചതായതിനാൽ ട്രെയിനിന് കുലുക്കം വളരെ കുറവായിരിക്കും. അതിനാൽ യാത്ര കൂടുതൽ സുഖകരമാകും. മികച്ച എയർ ബ്രേക്ക് സംവിധാനം. കൂടുതൽ സീറ്റിംഗ് കപ്പാസിറ്റി. ഫസ്റ്റ് എ.സി-24 ബർത്ത്, സെക്കൻഡ് എ.സി-54 ബർത്ത്, തേഡ് എ.സി 72-78-ബ‌‌ർത്ത്, സ്ലീപ്പർ ക്ലാസ്-78-80 ബർത്ത്, എ.സി ചെയർകാർ- 78-78 സീറ്റ്, എക്സിക്യൂട്ടീവ് ചെയർകാർ-56 സീറ്റ്, സെക്കൻഡ് സീറ്റിംഗ്-120 സീറ്റ് എന്നിങ്ങനെയാണ് സീറ്റിംഗ് കപ്പാസിറ്റി. അപകട സമയത്ത് കോച്ചുകൾ ഒന്നിനു മുകളിൽ ഒന്നായി കയറാത്ത ആന്റി-ടെലിസ്കോപിക് സംവിധാനമുള്ളവയാണ് എൽ.എച്ച്.ബി കോച്ചുകൾ. മണിക്കൂറിൽ 160-200 കിലോമീറ്റർ വേഗതയിൽ സുരക്ഷിതമായി സഞ്ചരിക്കാൻ സാധിക്കും.