പൊതുയിടങ്ങളിലെ മാലിന്യം നിക്ഷേപം: ജനങ്ങൾ ദുരിതത്തിൽ

മലയിൻകീഴ്: കാട്ടാക്കട-മലയിൻകീഴ് റോഡിലും പഞ്ചായത്ത്-ബണ്ട് റോഡുകളിലും മാലിന്യനിക്ഷേപം വ്യാപകമാകുന്നു. ആളൊഴിഞ്ഞ ഇടങ്ങളിലെല്ലാം മാലിന്യപ്പൊതികളാണ്. അന്തിയൂർക്കോണം-മൂങ്ങോട് റോഡ് മാലിന്യനിക്ഷേപ കേന്ദ്രമെന്നാണ് അറിയപ്പെടുന്നത്. പൊതികളായും ചാക്കുകളിലും
കൊണ്ടിടുന്ന മാലിന്യം പരിസരപ്രദേശത്താകെ ദുർഗന്ധം പരത്തുന്നതിനാൽ വീടുകളിൽ പോലും കഴിയാനാകാത്ത സ്ഥിതിയാണ്. മാലിന്യപ്പൊതികൾ കടിച്ചെടുത്ത് ഓടുന്ന തെരുവുനായ്ക്കൾ ഇരുചക്രവാഹന യാത്രക്കാർക്കും ഭീഷണയാകാറുണ്ട്. മാംസ-മത്സ്യ അവശിഷ്ടങ്ങൾ പക്ഷികൾ കൊത്തിയെടുത്ത് കിണറുകളിൽ കൊണ്ടിടുന്നതിനാൽ കുടിവെള്ളവും മലിനമാകുന്നു.

ചീനിവിള-പോങ്ങുംമൂട് റോഡിൽ മാലിന്യനിക്ഷേപത്തിന് അറുതിയില്ല.അടുത്തിടെ ഹരിതകർമ്മസേനാ പ്രവർത്തകർ റോഡിന് ഇരുവശത്തുമായി കിടന്ന മാലിന്യശേഖരം എടുത്തുമാറ്റിയെങ്കിലും വീണ്ടും മാലിന്യപ്പൊതികൾ നിറഞ്ഞിട്ടുണ്ട്.

മാലിന്യ നിക്ഷേപം വർദ്ധിക്കുന്നു

കുഴയ്ക്കാട്-അണപ്പാട് ബണ്ട്റോഡിലും മാലിന്യ നിക്ഷേപം വർദ്ധിച്ചിട്ടുണ്ട്. ബണ്ട് റോഡിന്റെ ഇരുവശങ്ങളിലും മാലിന്യം കൊണ്ടിടുന്നതിനാൽ ഇതുവഴി പോകുന്നവർ മൂക്ക് പൊത്തേണ്ട സ്ഥിതിയാണ്. ചാക്കുകളിലാക്കി കൊണ്ടിടുന്ന മാംസ-ഭക്ഷണാവശിഷ്ടങ്ങൾ ബണ്ടിൽ നിന്ന് തോട്ടിലേക്ക് വീണ് വെള്ളവും മലിനമാകാറുണ്ട്. മലയിൻകീഴ് ഗ്രാമപഞ്ചായത്തിലെ മേപ്പൂക്കട,ബ്ലോക്ക് ഓഫീസ് വാർഡുകളിലുൾപ്പെട്ട ഈ ഭാഗത്ത് ആൾവാസം കുറവായതിനാൽ സാമൂഹ്യവിരുദ്ധരുടെ ശല്യവുമുണ്ട്.

ബണ്ടിനോടു ചേർന്ന വാഴപ്പണയും റോഡുവക്കും രാത്രികാലങ്ങളിൽ ബാറായി മാറുമെന്നാണ് നാട്ടുകാർ പറയുന്നത്. ഇതുവഴി പൊലീസ് ജീപ്പ് വരാറില്ലത്രേ.മേപ്പൂക്കട നിന്ന് ഗതാഗതക്കുരുക്ക് ഇല്ലാതെ പോങ്ങുംമൂട്,അണപ്പാട്,ഊരൂട്ടമ്പലം ഭാഗത്തേക്ക് പോകാനുള്ള എളുപ്പമാർഗവുമാണീ റോഡ്.കടുത്ത വേനൽക്കാലത്തും നീരുറവ വറ്റാത്ത കുഴയ്ക്കാട് തോട് മാലിന്യനിക്ഷേപത്താൽ മലിനമാകുന്നതിൽ ജനങ്ങൾക്ക് ഉത്കണ്ഠയുണ്ട്.

പരാതി നൽകിയിട്ടും

ഇരട്ടക്കലുങ്ക്,മച്ചേൽ,വിളവൂർക്കൽ എന്നീ ബണ്ട് റോഡുകളിലും വ്യാപക മാലിന്യ നിക്ഷേപമാണ്. കുളിക്കുന്നതിനും തുണി അലക്കാനും കൃഷിക്കും ഈ തോടുകളിലെ വെള്ളമാണ് ഉപയോഗിക്കാറുള്ളത്. മാലിന്യങ്ങൾ കൊണ്ടിടുന്നവരെ കണ്ടെത്താൻ പലവട്ടം നാട്ടുകാരും റസിഡന്റ്സ് അസോസിയേഷൻ ഭാരവാഹികളും ശ്രമിക്കാറുണ്ടെങ്കിലും മാലിന്യനിക്ഷേപം കുറഞ്ഞിട്ടില്ല. മലയിൻകീഴ് ഗ്രാമപഞ്ചായത്തിലും പൊലീസിലും പരാതി നൽകിയെങ്കിലും പ്രയോജനമുണ്ടായില്ല.പൊതു ഇടങ്ങളിലെ മാലിന്യ നിക്ഷേപകർക്കെതിരെ നിയമനടപടി സ്വീകരിക്കണമെന്ന ആവശ്യം ശക്തമാണ്.