യുഎഇയിലെ കാലാവസ്ഥ മാറും, പ്രവാസികൾ ശ്രദ്ധിക്കുക; നിർദേശങ്ങളുമായി കാലാവസ്ഥ വകുപ്പ്

ദുബായ്: യുഎഇയിൽ വരും ദിവസങ്ങളിൽ കനത്ത ചൂട് അനുഭവപ്പെടുമെന്ന മുന്നറിയുപ്പുമായി ദേശീയ കാലാവസ്ഥാ നിരീക്ഷണ കേന്ദ്രം. രാജ്യത്തിന്റെ ഉൾനാടൻ പ്രദേശങ്ങളിൽ താപനില 40 ഡിഗ്രി സെൽഷ്യസ് വരെ ഉയരുമെന്നും അബുദാബിയിലെ ലിവയിൽ ചൂട് 46 ഡിഗ്രി സെൽഷ്യസ് വരെ ഉയരുമെന്നാണ് അറിയിപ്പ്.

തീരദേശ നഗരങ്ങളിൽ താപനിലയിൽ നേരിയ കുറവ് അനുഭവപ്പെടുമെങ്കിലും അബുദാബിയിലും ഷാർജയിലും താപനില 42 ഡിഗ്രി സെൽഷ്യസ് വരെയും ദുബായിൽ ചൂട് 40 ഡിഗ്രി വരെ ഉയരാമെന്നുമാണ് അറിയിച്ചിരിക്കുന്നത്. നിലവിൽ കാറ്റിന്റെ വേഗത മണിക്കൂറിൽ 10 മുതൽ 20 കിലോമീറ്റർ വരെയാണെങ്കിലും ചില സമയങ്ങളിൽ ഇത് 30 കിലോമീറ്റർ വരെ ഉയരാനുളള സാദ്ധ്യതയുണ്ട്. ശനി, ഞായർ ദിവസങ്ങളിൽ കാറ്റിന്റെ വേഗത മണിക്കൂറിൽ 35 കിലോമീറ്റർ വരെയാകാം. പുറം ജോലികളിൽ ഏർപ്പെടുന്നവർ കനത്ത ചൂടിനെതിരെ ജാഗ്രത പാലിക്കണമെന്ന് അധികൃതർ അറിയിച്ചു.