'ഗ്യാനേഷ് രാജിവച്ചേ മതിയാവൂ',​ മുംബയിലെ പ്രതിഷേധത്തിന് അനുമതിയില്ല; 'ജയിൽ നിറയ്ക്കൽ സമരം' പ്രഖ്യാപിച്ച് സിജെപി

ന്യൂഡൽഹി: ഒക്ടോബർ രണ്ടിന് ഗാന്ധിജയന്തി ദിനത്തിൽ മുംബയിൽ നടത്താനിരുന്ന പ്രതിഷേധത്തിന് പൊലീസ് അനുമതി നിഷേധിച്ചതായി കോക്ക്രോച്ച് ജനതാ പാർട്ടി (സി.ജെ.പി) അറിയിച്ചു. അനുമതി നിഷേധിച്ചാൽ മുംബയിൽ 'ജയിൽ നിറയ്ക്കൽ സമരം' നടത്തുമെന്ന് പാർട്ടി സ്ഥാപകൻ അഭിജീത് ദിപ്‌കെ പ്രഖ്യാപിച്ചു. പ്രതിഷേധിക്കാനുള്ള പൗരന്മാരുടെ അവകാശം തടയാനുള്ള ശ്രമമാണ് പൊലീസ് നടപടിയെന്ന് ദിപ്‌കെ ആരോപിച്ചു.

ചീഫ് ഇലക്ഷൻ കമ്മീഷണർ ഗ്യാനേഷ് കുമാർ രാജിവച്ച് പുറത്തുപോകണമെന്ന ആവശ്യവുമായാണ് സി.ജെ.പി ഒക്ടോബർ രണ്ടിന് പ്രതിഷേധം പ്രഖ്യാപിച്ചിരുന്നത്. ശിവാജി പാർക്കിൽ പ്രതിഷേധം നടത്തുന്നതിനായി ആവശ്യമായ അനുമതികൾ ലഭ്യമല്ലാത്തതും ഗതാഗതക്കുരുക്കും ശബ്ദമലിനീകരണവും ഉൾപ്പെടെയുള്ള കാരണങ്ങളാണ് പൊലീസ് ചൂണ്ടിക്കാട്ടിയത്.

വോട്ടർപട്ടിക പരിഷ്‌കരണത്തെച്ചൊല്ലി തിരഞ്ഞെടുപ്പ് കമ്മീഷനെതിരായ വിമർശനങ്ങൾക്കിടെയാണ് പ്രതിഷേധത്തിന് നീക്കം. കമ്മീഷന്റെ ചില തീരുമാനങ്ങളിൽ രണ്ട് തിരഞ്ഞെടുപ്പ് കമ്മീഷണർമാർക്കിടയിൽ അഭിപ്രായവ്യത്യാസമുണ്ടായെന്ന റിപ്പോർട്ടുകൾ നേരത്തെ രാഷ്ട്രീയ ചർച്ചകൾക്ക് വഴിവച്ചിരുന്നു. എന്നാൽ കമ്മീഷനിലെ അഭിപ്രായവ്യത്യാസങ്ങൾ സ്വാഭാവികമാണെന്നും സുപ്രധാന തീരുമാനങ്ങൾ ഏകകണ്ഠമായാണ് കൈക്കൊള്ളുന്നതെന്നും വ്യക്തമാക്കി തിരഞ്ഞെടുപ്പ് കമ്മീഷൻ സിജെപിയുടെ ആരോപണങ്ങൾ നിഷേധിച്ചിരുന്നു.

അതിനിടെ അസമിലും സി.ജെ.പിയും പൊലീസും തമ്മിൽ തർക്കം രൂക്ഷമായിരുന്നു. പാർട്ടിയുടെ സഹകൺവീനർ ആശുതോഷ് റാങ്കയെയും നിരവധി പ്രവർത്തകരെയും ഗോഹട്ടിയിൽ പൊലീസ് കസ്റ്റഡിയിലെടുത്തതായി സി.ജെ.പി ആരോപിച്ചിരുന്നു. പ്രാദേശിക വോളന്റിയർ യോഗത്തിന് മുന്നോടിയായാണ് നടപടി ഉണ്ടായതെന്നാണ് പാർട്ടി പറയുന്നത്.

റാങ്കയ്ക്കും മറ്റ് പ്രവർത്തകർക്കുമെതിരെ നടപടി സ്വീകരിച്ചതിന്റെ കാരണം വ്യക്തമാക്കിയില്ലെന്നും യോഗം തടയാനാണ് പൊലീസ് ഇടപെട്ടതെന്നും സി.ജെ.പി ആരോപിച്ചു. എന്നാൽ, ഇവരുടെ ആരോപണങ്ങൾ പാർട്ടിയുടെ ഭാഗത്തുനിന്നുള്ള അവകാശവാദങ്ങളായാണ് റിപ്പോർട്ടുകളിൽ വ്യക്തമാക്കിയിട്ടുള്ളത്. പിന്നീട് റാങ്ക ഉൾപ്പെടെയുള്ള കസ്റ്റഡിയിലെടുത്തവരെ വിട്ടയച്ചതായാണ് വിവരം. അസമിലെ സംഭവത്തിന് പിന്നാലെയാണ് മുംബയിലെ പ്രതിഷേധത്തിന് അനുമതി നിഷേധിച്ചതും ഇതിനെതിരെ 'ജയിൽ നിറയ്ക്കൽ സമരം' സിജെപി പ്രഖ്യാപിച്ചതും.