ആൻസിപ്പൊന്നിന് വെള്ളിത്തിളക്കം

നഗോയ: മലയാളി ലോംഗ് ജമ്പ് താരം ആൻസി സോജന് നഗോയ ഏഷ്യൻ ഗെയിംസിൽ വെള്ളി മെഡൽ. ചൈനീസ് താരം യിംഗ് ഇംഗ് ഹുവാംഗ് അവസാനശ്രമത്തിൽ ചാടിയ 6.55 മീറ്റർ ദൂരമാണ് നാടകീയ വഴിത്തിരിവുണ്ടാക്കിയത്. ആദ്യ ശ്രമത്തിൽ 6.49 മീറ്റർ ചാടി മുന്നിലെത്തിയിരുന്ന ആൻസി, അവസാനശ്രമത്തിൽ 6.53 മീറ്റർ താണ്ടി സ്വർണനേട്ടം ആഘോഷിക്കാൻ തയ്യാറെടുക്കുന്നതിനിടെയാണ് ചൈനീസ് ചാട്ടം വിധി മാറ്റിയെഴുതിയത്.

തുടർച്ചയായ രണ്ടാം ഏഷ്യൻ ഗെയിംസിലാണ് തൃശൂർ നാട്ടിക സ്വദേശിയായ ആൻസി വെള്ളി നേടുന്നത്. ആൻസി ഈ വർഷം 6.88 മീറ്റർ ചാടി അഞ്ജു ബോബി ജോർജിന്റെ റെക്കാഡ് തിരുത്തിയെഴുതിയിരുന്നു.

സ്ക്വാഷിൽ ഇരട്ട വെള്ളി

• സ്ക്വാഷിൽ അഭയ് സിംഗ് പുരുഷ സിംഗിൾസിലും അനാഹത്ത് സിംഗ് വനിതാ സിംഗിൾസിലും വെള്ളി നേടി.
• പുരുഷ ഹൈജമ്പിൽ വെള്ളി നേടി സർവേഷ് കുശാരേ.
• 200 മീറ്ററിൽ ഹരിത ഭദ്രയ്ക്കും ഡെക്കാത്ത്ലണിൽ തേജസ്വിൻ ശങ്കറിനും സ്റ്റീപ്പിൾ ചേസിൽ പരുൾ ചൗധരിക്കും വെങ്കലം.
• 4 സ്വർണവും 15 വെള്ളിയും 18വെങ്കലവും ഉൾപ്പടെ 37 മെഡലുകളുമായി ഇന്ത്യ 12-ാം സ്ഥാനത്ത്.