കെഎസ്ആർടിസി ബസിൽ യുവതിക്ക്  നേരെ  ലൈംഗികാതിക്രമം; കണ്ടക്ടർ  ഇടപെട്ടില്ലെന്ന് പരാതി

കൊണ്ടോട്ടി: മലപ്പുറത്ത് കെഎസ്ആർടിസി ബസിൽ വച്ച് യുവതിക്ക് നേരെ ലൈംഗികാതിക്രമവും നഗ്നതാ പ്രദർശനവും നടന്നതായി പരാതി. കോഴിക്കോട് - പാലക്കാട് റൂട്ടിൽ സർവീസ് നടത്തുന്ന 'KL-15 A 1529' നമ്പർ ബസിലാണ് സംഭവം. മോങ്ങം സ്വദേശിനിയാണ് പരാതിക്കാരി.

സംഭവത്തിൽ കൊണ്ടോട്ടി പൊലീസ് കേസ് രജിസ്റ്റർ ചെയ്തിട്ടുണ്ട്. ബസിലെ ജനറൽ സീറ്റിൽ ഇരിക്കുകയായിരുന്ന യുവതിയോട് പ്രതി അവിടെ ഇരിക്കുന്നതിനെക്കുറിച്ച് ചോദ്യം ചെയ്തതാണ് തുടക്കം. ഇതിനുപിന്നാലെ മോശമായി പെരുമാറിയെന്നാണ് പരാതി. പ്രതി കൈമുട്ടുകൊണ്ട് യുവതിയുടെ സ്വകാര്യഭാഗത്ത് സ്പർശിച്ചെന്നും നഗ്നതാ പ്രദർശനം നടത്തിയെന്നും പരാതിയിൽ പറയുന്നു. സംഭവത്തിൽ ബസ് കണ്ടക്ടർ ഇടപെട്ടില്ലെന്നും യുവതി ആരോപിക്കുന്നു.