നിർമ്മാണം പൂർത്തിയായിട്ടും പൂട്ടിയിട്ട് 'ആയുഷ്മാൻ മന്ദിർ'

 രാഷ്ട്രീയ പകപോക്കലെന്ന്

ആലത്തൂർ: പണി പൂർത്തിയാകാത്ത കെട്ടിടങ്ങൾ പോലും ധൃതിപിടിച്ച് ഉദ്ഘാടനം ചെയ്യുന്ന കാഴ്ചകൾക്കിടയിൽ, എല്ലാ പണികളും പൂർത്തിയായിട്ടും ജനങ്ങൾക്ക് തുറന്നു കൊടുക്കാതെ ആലത്തൂർ പുതിയങ്കത്തെ ആയുഷ്മാൻ മന്ദിർ (ജനകീയ ആരോഗ്യ കേന്ദ്രം) അധികൃതർ പൂട്ടിയിട്ടിരിക്കുന്നു. ആരോഗ്യവകുപ്പ് അനുവദിച്ച 55 ലക്ഷം രൂപ ചെലവഴിച്ചാണ് ഈ പുതിയ കെട്ടിടം നിർമ്മിച്ചത്. കാലപ്പഴക്കം ചെന്ന പഴയ ആരോഗ്യ ഉപകേന്ദ്രത്തിന്റെ കെട്ടിടം പൊളിച്ചുമാറ്റിയാണ് രണ്ട് നിലകളിലായി 150 ചതുരശ്ര മീറ്റർ വിസ്തൃതിയുള്ള പുതിയ മന്ദിരം പണിതുയർത്തിയത്.

വിവിധങ്ങളായ ആരോഗ്യസേവനങ്ങൾ പ്രദേശവാസികൾക്ക് ലഭ്യമാക്കുക എന്ന ലക്ഷ്യത്തോടെയാണ് ആയുഷ്മാൻ മന്ദിർ നിർമ്മിച്ചത്. രോഗപ്രതിരോധ കുത്തിവെപ്പുകൾ, ചൊവ്വാഴ്ചകളിൽ ഗർഭിണികൾക്കുള്ള പ്രത്യേക പരിശോധനകൾ, വ്യാഴാഴ്ചകളിലെ ജീവിതശൈലീ രോഗനിർണ്ണയ ക്ലിനിക്ക് എന്നിവയ്ക്കു പുറമെ ജൂനിയർ പബ്ലിക് ഹെൽത്ത് നഴ്സിനുള്ള ക്വാർട്ടേഴ്സ്, മൂന്ന് വാർഡുകളിലെ ആരോഗ്യ ഫീൽഡ് പ്രവർത്തനങ്ങൾ ഏകോപിപ്പിക്കാനുള്ള കോൺഫറൻസ് ഹാൾ, ശുചിമുറി എന്നിവയെല്ലാം പുതിയ കെട്ടിടത്തിൽ സജ്ജീകരിച്ചിട്ടുണ്ട്.

2024 ജൂലായ് 20ന് കെ.രാധാകൃഷ്ണൻ എം.പിയാണ് മന്ദിരത്തിന്റെ നിർമ്മാണോദ്ഘാടനം നിർവ്വഹിച്ചത്. കെട്ടിട നിർമ്മാണത്തിന് ആവശ്യമായ ഫണ്ട് ലഭ്യമാക്കാൻ സജീവമായി പരിശ്രമിച്ച കോൺഗ്രസ് വാർഡ് അംഗം ലീല ശശി, ഐ.എൻ.ടി.യു.സി ജില്ലാ സെക്രട്ടറി തുപ്പാളൂർ ശശി എന്നിവരെ രാഷ്ട്രീയമായി ഒതുക്കാൻ വേണ്ടിയാണ് ഈ മെല്ലെപ്പോക്ക് എന്നാണ് ഉയരുന്ന പ്രധാന ആക്ഷേപം. ഭരണസമിതി രാഷ്ട്രീയ താല്പര്യങ്ങൾ മുൻനിറുത്തി ജനങ്ങളുടെ ആരോഗ്യ ആവശ്യങ്ങളെ അവഗണിക്കുകയാണെന്ന് ചൂണ്ടിക്കാട്ടി കോൺഗ്രസ് നേതൃത്വം ആരോഗ്യമന്ത്രിക്ക് നേരിട്ട് പരാതി നൽകിയിട്ടുണ്ട്. എന്നാൽ, ആരോപണങ്ങളെല്ലാം ബന്ധപ്പെട്ട അധികൃതർ പൂർണ്ണമായും നിഷേധിച്ചു. കെട്ടിടം എത്രയും വേഗം തുറന്നു പ്രവർത്തിക്കാൻ ആവശ്യമായ അടിയന്തര നടപടികൾ സ്വീകരിക്കണമെന്ന് ആവശ്യപ്പെട്ട് മന്ത്രി കെ.മുരളീധരന് ലീല ശശി നിവേദനം സമർപ്പിച്ചു.