കവർന്നത് വൃദ്ധയുടെ സ്വർണാഭരണങ്ങൾ, സ്വകാര്യ ബസിൽ മോഷണം : മൂന്ന് തമി​ഴ് സ്ത്രീകൾ പി​ടി​യി​ൽ

അടൂർ: സ്വകാര്യ ബസിൽ യാത്രചെയ്ത വൃദ്ധയുടെ സ്വർണാഭരണങ്ങൾ കവർന്ന തമിഴ്നാട് സ്വദേശികളായ മൂന്ന് സ്ത്രീകൾ പൊലീസ് പിടിയിലായി​. അടൂർ അമ്മകണ്ടകര മോഹന വിലാസത്തിൽ വിജയമ്മ (65)യുടെ ആഭരണങ്ങളാണ് നഷ്ടമായത്. ചൊവ്വാഴ്ച്ച ഉച്ചയ്ക്ക് 1.45ന് ആയി​രുന്നു സംഭവം. തെങ്കാശി പൂതർ സ്വദേശികളായ പ്രിയ, മുരുകമ്മ, കാളി എന്നിവരെ പൊലീസ് അറസ്റ്റ് ചെയ്തു. അടൂർ കെ.എസ്.എഫ്.ഇയിൽ ചി​ട്ടി​ക്ക് ഈടുവച്ചി​രുന്ന സ്വർണ്ണവും എടുത്ത് കായംകുളം ഭാഗത്തേക്ക് ബസിൽ യാത്ര ചെയ്യുകയായിരുന്നു വിജയമ്മ. അടൂർ ചേന്നംമ്പള്ളി ജംഗ്ഷനും ലൈഫ് ലൈൻ ആശുപത്രിയ്ക്കും ഇടയിലെ വായനശാല ജംഗ്ഷനിൽ ബസിറങ്ങിയശേഷം കൈവശം ഉണ്ടായിരുന്ന ബാഗ് തുറന്നു കിടക്കുന്നത് ശ്രദ്ധയിൽപ്പെട്ട് പരിശോധിച്ചപ്പോൾ ആണ് സ്വർണ്ണം നഷ്ടപ്പെട്ട വി​വരം അറി​യുന്നത്. മൂന്നുവള, ലോക്കറ്റ്, കൊലുസ് എന്നിവ അടങ്ങുന്ന അഞ്ചു പവൻ സ്വർണമായിരുന്നു ബാഗിൽ. ബസിൽ സമീപത്ത് നിന്ന് യാത്രചെയ്ത ഒരു സ്ത്രീയെ സംശയി​ച്ച വിജയമ്മ, അതുവഴി വന്ന ഒരു പരിചയക്കാരന്റെ വാഹനത്തിൽ കയറി ബസിനെ പിന്തുടർന്നു. പതിനാലാം മൈൽ ജംഗ്ഷനു സമീപം എത്തിയപ്പോൾ ബസിൽ ഉണ്ടായിരുന്ന സ്ത്രീ നടന്നു പോകുന്നത് ശ്രദ്ധയി​ൽപ്പെട്ടു. ഇവരെ തടയാൻ ശ്രമിച്ചപ്പോൾ ഇവരുടെ സമീപത്ത് കൂടി നടന്നുപോയ മറ്റ് രണ്ട് സ്ത്രീകളും ഓടി രക്ഷപ്പെടാൻ ശ്രമിച്ചു. വിജയമ്മ ബഹളം വച്ചതോടെ നാട്ടുകാർ മൂന്ന് പേരെയും തടഞ്ഞുവച്ചു. തുടർന്ന് അടൂർ പൊലീസ് സ്ഥലത്തെത്തി പ്രതി​കളെ കസ്റ്റഡിയിലെടുക്കുകയായി​രുന്നു.