മലബാർ ഗോൾഡിന് റെക്കാഡ് അക്ഷയതൃതീയ വിൽപ്പന

കൊച്ചി: ആഗോള ജുവലറി ബ്രാൻഡായ മലബാർ ഗോൾഡ് ആൻഡ് ഡയമണ്ട്സ് അക്ഷയതൃതീയയിൽ റെക്കാഡ് വിൽപ്പന കൈവരിച്ചു. കഴിഞ്ഞ വർഷത്തേക്കാൾ ആഗോള വിൽപ്പനയിൽ 53 ശതമാനം വളർച്ചയാണുണ്ടായത്. അക്ഷയതൃതീയയിലെ മൊത്തം വിറ്റുവരവ് 2,646 കോടി രൂപയാണ്. ഇന്ത്യയിലെ വിൽപ്പനയിൽ 71 ശതമാനം വർദ്ധയുണ്ട്. വിദേശ വിപണികളിൽ 22 ശതമാനം വളർച്ചയും രേഖപ്പെടുത്തി.

മലബാർ ഗോൾഡ് ഉപഭോക്താക്കളെ സംബന്ധിച്ചിടത്തോളം അക്ഷയതൃതീയ സുപ്രധാനമായ അവസരമാണെന്നും ഈ വർഷത്തെ പ്രകടനം ഉപഭോക്താക്കളുടെ വിശ്വാസത്തെയും വിപണിയിലെ ഡിമാൻഡിനെയുമാണ് പ്രതിഫലിപ്പിക്കുന്നതെന്നും മലബാർ ഗ്രൂപ്പ് ചെയർമാൻ എം.പി അഹമ്മദ് പറഞ്ഞു. റെസ്‌പോണ്‍സിബിൾ ജുവലറിയെന്ന നിലയിൽ ഉപഭോക്താക്കൾ അർപ്പിക്കുന്ന വിശ്വാസമാണ് വളർച്ചയുടെ അടിസ്ഥാനമെന്നും അദ്ദേഹം പറഞ്ഞു. വിവാഹ പർച്ചേസുകൾക്കൊപ്പം യുവ ആഭരണ പ്രേമികളുടെയും പുതിയ ഉപഭോക്താക്കളുടെയും പങ്കാളിത്തം വഴി 1.25 ലക്ഷത്തിലധികം ആളുകളാണ് ഇത്തവണത്തെ അക്ഷയതൃതീയയിൽ മലബാർ ഗോൾഡിൽ നിന്ന് ആഭരണങ്ങൾ വാങ്ങാനെത്തിയത്. ഡയമണ്ട് പതിപ്പിച്ച ആഭരണങ്ങളുടെ വിൽപ്പനയിൽ 45 ശതമാനം വളർച്ചയുണ്ടായി.