നിപ്മറിന് യു.എൻ കർമ്മസേന പുരസ്‌കാരം

തൃശൂർ: ഭിന്നശേഷി മേഖലയിലെ രാജ്യാന്തര സ്ഥാപനമായി വികസിച്ച നാഷണൽ ഇൻസ്റ്റിറ്റ്യൂട്ട് ഒഫ് ഫിസിക്കൽ മെഡിസിൻ ആൻഡ് റിഹാബിലിറ്റേഷന് (നിപ്മർ) ഐക്യരാഷ്ട്ര സംഘടനയുടെ കർമ്മസേന പുരസ്‌കാരം ലഭിച്ചതായി മന്ത്രി ഡോ. ആർ. ബിന്ദു. 25ന് യു.എൻ പൊതുസഭയുടെ 79-ാം സമ്മേളനത്തിന് അനുബന്ധമായി 'കർമ്മസേന സൗഹൃദ' യോഗത്തിലാണ് പുരസ്‌കാര സമർപ്പണം.
2023ൽ പകർച്ചേതര വ്യാധികളുടെ നിയന്ത്രണം,മാനസികാരോഗ്യം,സഹായക സാങ്കേതികവിദ്യ എന്നീ മേഖലകളിൽ തിളക്കമാർന്ന പ്രവർത്തനം കാഴ്ചവച്ച സ്ഥാപനങ്ങളിൽ നിന്നാണ് നിപ്മറിനെ തിരഞ്ഞെടുത്തതെന്നും മന്ത്രി വാർത്താ സമ്മേളനത്തിൽ വിശദീകരിച്ചു.