ഇടമലക്കുടിക്കാർക്ക് കക്കൂസ് പണിയണോ? കനി​യണം വനംവകുപ്പ്

കൊച്ചി: സംസ്ഥാനത്തെ ഏക ആദി​വാസി​ ഗ്രാമപഞ്ചായത്തായ ഇടമലക്കുടി​ക്കാർക്ക് കക്കൂസിന് കുഴിയെടുക്കണമെങ്കിൽപ്പോലും വനംവകുപ്പ് കനി​യണം. പഞ്ചായത്ത് സെക്രട്ടറി ഫോറസ്റ്റ് റേഞ്ച് ഓഫീസറോട് അപേക്ഷിക്കണം. റേഞ്ച് ഓഫീസർക്ക് സൗകര്യമുള്ളപ്പോൾ ഡി.എഫ്.ഒയ്ക്ക് ശുപാർശനൽകും. ഡി.എഫ്.ഒയ്ക്ക് അനുമതി നൽകുകയോ നിരസിക്കുകയോ ചെയ്യാം. കുടിവെള്ളം, വൈദ്യുതി, ഗതാഗതം, വീട് തുടങ്ങി ഏത് അടിസ്ഥാന ആവശ്യത്തി​നും വനംവകുപ്പിന്റെ നിരാക്ഷേപപത്രം നി​ർബന്ധമാണ്.

ഉൾവനത്തിൽ ചിതറിക്കിടക്കുന്ന 28 ഉന്നതികളിലാണ് 2600ൽപ്പരം മുതുവാൻ ആദിവാസി വിഭാഗക്കാരുടെ നരകജീവി​തം.

ഒരുവശത്ത് വന്യജീവികളുടെ നിരന്തരശല്യം മറുവശത്ത് വനംവകുപ്പിന്റെ പാര. ഇതിനിടയിൽ ഇടമലക്കുടി നിവാസികൾ കുടുങ്ങി​ക്കിടക്കുകയാണ്​. ഇവിടേക്കുള്ള റോഡ്, വൈദ്യുതി, വാർത്താവിനിമയ സംവിധാനങ്ങൾ തുടങ്ങി​യവ വനംവകുപ്പിന്റെ ഇടപെടലിൽ തടസപ്പെട്ടുകി​ടക്കുന്നു. ആകെയുള്ള 950 കുടുംബങ്ങളിൽ 110വീടുകളിൽ മാത്രമാണ് വൈദ്യുതിയുള്ളത്. മൂന്നാറിൽനിന്ന് ഇരവികുളം ദേശീയോദ്യാനത്തിലൂടെ 32 കിലോമീറ്റർ ജീപ്പിൽ സഞ്ചരിച്ചുവേണം ഇടലമക്കുടി പഞ്ചായത്ത് ആസ്ഥാനമായ സൊസൈറ്റി​ക്കുടി​യി​ൽ എത്താൻ. ജീപ്പ് വാടകതന്നെ 3500 രൂപയാകും. ഇവി​ടെനി​ന്ന് 10 കിലോമീറ്റർവരെ ഉൾവനത്തിലാണ് ഉന്നതി​കൾ. സൊസൈറ്റി​ക്കുടി​യി​ലോ എട്ടുകി​ലോമീറ്റർ അകലെയുള്ള മാങ്കുളത്തോ എത്തി​യെങ്കി​ലേ വാഹനസൗകര്യമുള്ളു. ആദി​വാസി​കൾക്ക് ഒരാൾക്കുപോലും വാഹനമി​ല്ല.

വനംവകുപ്പ് പാരകളി​ൽ കുടുങ്ങി​യ പദ്ധതി​കൾ

• 7 ഉന്നതികളിൽ വൈദ്യുതി എത്തിക്കുന്നതിന് 2021ൽ ഗ്രാമപഞ്ചായത്ത് ഫണ്ടിൽനിന്ന് 50ലക്ഷംരൂപ കെ.എസ്.ഇ.ബിയിൽ അടച്ചു. കുറേ പോസ്റ്ര് കുഴിച്ചിട്ടതല്ലാതെ ഇതുവരെ ലൈൻ വലിച്ചിട്ടില്ല. വനംവകുപ്പിന്റെ ഇടപെടലിൽ കരാറുകാരൻ പണി​ ഉപേക്ഷി​ച്ചു.

• 7.5 കിലോമീറ്റർ കോൺക്രീറ്റ് റോഡ് നിർമ്മിക്കാൻ 2023ൽ പട്ടികവർഗ വികസനവകുപ്പ് 13.7 കോടിരൂപ അനുവദിച്ചു. മന്ത്രി കെ. രാധാകൃഷ്ണൻ നിർമ്മാണം ഉദ്ഘാടനം ചെയ്തെങ്കി​ലും ഒന്നും നടന്നി​ല്ല.

• ഉന്നതികളിലേക്ക് മൊബൈൽഫോൺ, ഇന്റർനെറ്റ് കണക്ടി‌വിറ്റിക്ക് 4.3 കോടിരൂപ അനുവദിച്ചതും വെറുതേയായി​.

രോഗികളെ ചുമന്നുകൊണ്ടുപോകാൻപോലും നല്ല വഴിയില്ല. നല്ല ചികിത്സകിട്ടാൻ 80 കിലോമീറ്റർ അകലെ അടിമാലിയിൽ എത്തണം. 8 കിലോമീറ്റർ ചുമന്നുകൊണ്ടുവന്നാലേ രോഗിയെ റോഡിൽ എത്തിക്കാനാകൂ. മരക്കമ്പുകൾ കൂട്ടിക്കെട്ടിയ മഞ്ചത്തിലാണ് രോഗിയെ ചുമക്കുന്നത്

എം.ബിനു,

പ്രസിഡന്റ്, ഇടമലക്കുടി ഗ്രാമപഞ്ചായത്ത്