ഐക്യകേരള ചരിത്രത്തിൽ കൈയ്യൊപ്പു ചാർത്തി കോട്ടയം

കോട്ടയം: കേരളം പിറവിയുടെ എഴുപതാം പിറന്നാൾ ഇന്ന് ആഘോഷിക്കുമ്പോൾ സംസ്ഥാനത്തിന്റെ വിദ്യാഭ്യാസ,​സാംസ്കാരിക, രാഷ്ട്രീയ ,​സാമ്പത്തിക വളർച്ചയിൽ നിർണായകസ്ഥാനമാണ് മലയും കായലും അതിരിടുന്ന കോട്ടയം ജില്ലയ്ക്കുള്ളത്.

അഞ്ച് ജില്ലകളായി കേരളം രൂപീകരിച്ചപ്പോൾ, തിരുവനന്തപുരം,​കൊല്ലം തൃശൂർ മലബാർ ജില്ലകൾക്കൊപ്പം കോട്ടയവും ഉൾപ്പെട്ടിരുന്നു. 1949 ജൂലായിലാണ് കോട്ടയം ജില്ല രൂപീകരിക്കുന്നത്. ശബരിമലയും തേക്കടിയുമടക്കം അന്ന് കോട്ടയത്തായിരുന്നു. ശതാബ്ദി പിന്നിട്ട ആദ്യ പത്രമായ ദീപിക,​ ആദ്യ കലാലയമായ സിഎം.എസ് കോളേജ്,​ ആദ്യ പ്രസായ സിഎം.എസ് പ്രസ് ,​ എഴുത്തുകാരുടെ ആദ്യ സംഘമായ സാഹിത്യപ്രവർത്തക സഹകരണ സംഘം തുടങ്ങി സാംസ്കാരിക മികവിന്റെ കേന്ദ്രങ്ങളുടെ നിര നീളുകയാണ്. വാണിജ്യ മേഖലയിൽ ഇന്ത്യയിൽ ഏറ്റവും കൂടുതൽ റബർ ഉത്പാദിപ്പിക്കുന്നതും കോട്ടയം ജില്ലയിലാണ്.

തിരുവിതാംകൂറിലെ ജനങ്ങൾക്ക് സർക്കാർ ജോലികളിൽ അർഹമായ പ്രാതിനിധ്യം ഉറപ്പാക്കാൻ 1891-ൽ നടന്ന മലയാളി മെമ്മോറിയൽ പ്രക്ഷോഭത്തിന്റെ ആലോചനകൾക്കും ഡ്രാഫ്റ്റിങ്ങിനും വേദിയായത് കോട്ടയം പബ്ലിക് ലൈബ്രറിയായിരുന്നു.

കേരള നവോത്ഥാന ചരിത്രത്തിലെ സുവർണ്ണ അദ്ധ്യായമായ വൈക്കം സത്യാഗ്രഹം ,​ശിവഗിരി തീർത്ഥാടനത്തിന് ശ്രീനാരായണ ഗുരു അനുഗ്രഹാനുമതി നൽകിയ നാഗമ്പടം ആദ്യ എസ്.എൻ.ഡി.പി യോഗം ശാഖ ഇതെല്ലാം കോട്ടയത്തായിരുന്നു

അച്ചടിശാലകളും മാദ്ധ്യമങ്ങളും

കേരളപ്പിറവിക്ക് മുൻപും ശേഷവും മലയാള ഭാഷയെയും സംസ്‌കാരത്തെയും ജനങ്ങളിലേക്ക് എത്തിക്കുന്നതിൽ കോട്ടയത്തെ അച്ചടിശാലകളും മാദ്ധ്യമങ്ങളും വലിയ പങ്കുവഹിച്ചു .ശതാബ്ദി പിന്നിട്ട രണ്ടു പത്രങ്ങളാണ് കോട്ടയത്തുള്ളത്. രാമപുരത്ത് വാര്യർ,​ ബഷീർ,​ കാരൂർ,​ പാലാ നാരായണൻനായർ,​ മുട്ടത്തുവർക്കി, പൊൻകുന്നം വർക്കി,​ ലളിതാംബിക അന്തർജനം എൻ.എൻ.പിള്ള,​ ചെമ്മനം ചാക്കോ,​ അരുന്ധതി റോയി ,​കെ.ആർ.മീര,​ഹരീഷ് തുടങ്ങിയ എഴുത്തുകാരുടെ നിര കോട്ടയത്തിന്റെ സംഭാവനയാണ്,​ ആദ്യനായിക കമലം,​ മമ്മൂട്ടി, തിലകൻ,​ ജോസ് പ്രകാശ്,​ കോട്ടയം ചെല്ലപ്പൻ,​ അച്ചൻകുഞ്ഞ്,​ സംവിധായകരായ അരവിന്ദൻ,​ ജോൺഎബ്രഹാം,​ ജയരാജ് തുടങ്ങിയ സിനിമാരംഗത്തെ പ്രമുഖരെയും കോട്ടയം സംഭാവന ചെയ്തു.

പ്രഗത്ഭരുടെ നിര

മലയാളിയായ രാഷ്ട്രപതി കെ.ആർ.നാരായണൻ, സുപ്രീം കോടതി ചീഫ് ജസ്റ്റിസ് കെ.ജി ബാലകൃഷ്ണൻ,​ ലോകപൗരനെന്നറിയപ്പെടുന്ന കെ.പി.എസ് മേനോൻ ,​ രാഷ്ടീയ രംഗത്ത് പി.കെ.വി,​ ഉമ്മൻചാണ്ടി,​ കെ.എം.മാണി,​ കാനം രാജേന്ദ്രൻ​ തുടങ്ങി നേതാക്കളുടെ നിരനീളുന്നു. കേരളാകോൺഗ്രസ് പാർട്ടി ജന്മമെടുത്തതും ആദ്യകമ്മ്യൂണിസ്റ്റ് സർക്കാരിന്റെ പിരിച്ചുവിടലിന് വഴിയൊരുക്കിയ വിമോചനസമരത്തിന് തുടക്കമിട്ടതും കോട്ടയത്താണ്. എൻ.എസ്.എസ് ആസ്ഥാനവും ഓർത്തഡോക്സ്,​ കത്തോലിക്കാസഭാ ആസ്ഥാനങ്ങളും കോട്ടയം ജില്ലയിലാണ് സ്ഥിതി ചെയ്യുന്നത്.