അർജന്റീനയെ പൂട്ടാൻ ബ്രസീലും പോർച്ചുഗലും ഒന്നിക്കുന്നു! കട്ടപ്പകയിൽ ഒന്നായി ആരാധകർ

കാളികാവ്: അമ്മാവൻ വീണിട്ടാണെങ്കിലും വേണ്ടില്ല, അമ്മായി ഒന്നു കരഞ്ഞ് കണ്ടാൽ മതി എന്നത് പോലെയാണ് ലോകകപ്പ് അവസാന ഘട്ടത്തിലെ ആരാധകരുടെ അവസ്ഥ. സ്വന്തം ടീം പുറത്തായതിന്റെ സങ്കടത്തേക്കാൾ ശേഷിക്കുന്ന കരുത്തരായ അർജന്റീനയും മെസ്സിയും കിരീടത്തിലെത്തെരുത് എന്നാണ് എതിരാളികളുടെ ഇപ്പോഴത്തെ പ്രാർത്ഥന. ബ്രസീൽ, പോർച്ചുഗൽ ഉൾപ്പെടെ പുറത്തായ വമ്പൻ ടീമുകളുടെ ആരാധകർ ഇപ്പോൾ കൂട്ടത്തോടെ അർജന്റീനയുടെ എതിരാളികളുടെ ചേരിയിലാണ്. ഇതേ തുടർന്നുള്ള തർക്കങ്ങളും വാഗ്വാദങ്ങളുമാണ് നാട്ടിൻപുറങ്ങളിൽ കാണുന്നത്.
അർജന്റീനയുടെ എതിരാളി ആരായാലും പിന്തുണ അവർക്കാണ്. ലക്ഷ്യം ഒന്ന് മാത്രം- മെസ്സി തോൽക്കണം, അർജന്റീന കിരീടം നേടരുത്. ബ്രസീൽ പുറത്തായതോടെ അർജന്റീന ആരാധകർ ആഘോഷമാക്കി. ബ്രസീൽ താരം പെനാൽറ്റി പാഴാക്കിയതിനെ അർജന്റീന ആരാധകർ കടന്നാക്രമിച്ചു. മെസ്സിയെ പെനാൽറ്റി അടിപ്പിക്കാൻ പഠിപ്പിച്ചവരല്ലേ... അതിനിടയിൽ സ്വന്തം കളിക്കാരെ പഠിപ്പിക്കാൻ മറന്നുപോയി എന്ന ട്രോളാണ് സമൂഹമാദ്ധ്യമങ്ങളിൽ ഏറ്റവും കൂടുതൽ പ്രചരിപ്പിച്ചത്.
പോർച്ചുഗൽ ആരാധകരിലും സമാന വികാരമാണ്. ക്രിസ്റ്റ്യനോ റൊണാൾഡോയുടെ അവസാന ലോകകപ്പ് നിരാശയിൽ അവസാനിച്ചതുപോലെ മെസ്സിയുടെയും ലോകകപ്പ് യാത്ര അവസാനിക്കണമെന്നാണ് ഒരു വിഭാഗത്തിന്റെ ആഗ്രഹം. ഇതിനിടെ ലോകകപ്പിലെ അട്ടിമറി വിജയങ്ങളിലൂടെ സ്‌പെയിൻ പോലുള്ള ടീമുകൾ വലിയ ആരാധക പിന്തുണ നേടിയിട്ടുണ്ട്. നിഷ്പക്ഷരായ പലരും ഇപ്പോൾ പുതിയ ടീമുകൾക്കൊപ്പം നിൽക്കുകയാണ്.
എന്നാൽ അർജന്റീന ആരാധകരുടെ മറുപടി വേറെയാണ്. ഞങ്ങളെ തോൽപ്പിക്കാൻ ഇത്രയും ടീമുകളുടെ ആരാധകർ ഒന്നിക്കേണ്ടി വരുന്നത് തന്നെ അർജന്റീനയുടെ കരുത്തിന്റെ തെളിവാണ്. പ്രീ ക്വാർട്ടറിൽ പുറത്തായവർക്ക് സെമിയിൽ എത്തിയ ടീമുകളെ പരിഹസിക്കാൻ അവകാശമില്ല എന്നാണ് അവരുടെ വാദം