അഞ്ചുതെങ്ങ് ആശുപത്രിയിൽ ആംബുലൻസ് ഡ്രൈവറില്ല, രോഗികൾ ദുരിതത്തിൽ

വക്കം:അഞ്ചുതെങ്ങ് കുടുംബാരോഗ്യ കേന്ദ്രത്തിൽ ആംബുലൻസ് ഡ്രൈവറില്ലാത്തത് രോഗികളെ വലയ്ക്കുന്നു.തീരദേശവാസികളുടെ ഏകാശ്രയ കേന്ദ്രമായ ആശുപത്രിയിലാണ് രണ്ട് മാസത്തിലേറേയായി ഡ്രൈവറില്ലാതെ ആംബുലൻസ് പൊടിപ്പിടിച്ച് ഷെഡിൽ കിടക്കുന്നത്.

ഈ വാഹനത്തിലായിരുന്നു അടിയന്തര സാഹചര്യങ്ങളിൽ തിരുവനന്തപുരം മെഡിക്കൽ കോളേജ് ഉൾപ്പെടെയുള്ള ആശുപത്രികളിലേക്ക് സൗജന്യമായി രോഗികളെ എത്തിച്ചിരുന്നത്.താത്കാലിക തസ്തികയിൽ ജോലി ചെയ്തിരുന്ന ഡ്രൈവർ രാജിവച്ചതോടെയാണ് ആംബുലൻസ് ഷെഡിലായത്.

പുതിയ ഡ്രൈവറിനെ നിയമിക്കാൻ ഗ്രാമപഞ്ചായത്ത് ഇതുവരെ തയ്യാറായിട്ടില്ല.എത്രയും പെട്ടെന്ന് എംപ്ലോയ്മെന്റ് വഴി ഈ തസ്തികയിലേക്ക് നിയമനം നടത്തണമെന്നാണ് പ്രദേശവാസികളുടെ ആവശ്യം.

രണ്ട് ആംബുലൻസുണ്ടെങ്കിലും

ആശുപത്രിക്ക് രണ്ട് ആംബുലൻസുകളാണ് ഉള്ളത്.ഒരെണ്ണം പാലിയേറ്റിവ് കെയർ രോഗികളുടെ പരിചരണങ്ങൾക്കും മറ്റുമായി ഉപയോഗിക്കുകയാണ്.മറ്റൊരു വാഹനം പഞ്ചായത്തിന്റെ നിയന്ത്രണത്തിലാണ് പ്രവർത്തിക്കുന്നത്.ഈ വാഹനമാണ് കഴിഞ്ഞ രണ്ടു മാസക്കാലമായി ഡ്രൈവറില്ലാത്തതിനെ തുടർന്ന് പാർക്കിംഗ് ഷെഡിൽ പൊടിപ്പിടിച്ച് കിടക്കുന്നത്.