നെയ്യാറ്റിൻകര ജനറൽ ആശുപത്രിയിൽ ചികിത്സ കിട്ടാതെ രോഗികൾ മടങ്ങുന്നു

നെയ്യാറ്റിൻകര: നെയ്യാറ്റിൻകര ജില്ലാ ജനറൽ ആശുപത്രിയിൽ ഉച്ചക്ക് ശേഷം ഒ.പിയിൽ ഡോക്ടർമാരില്ല. ക്യൂ നിന്ന് മടുത്ത രോഗികൾ മടങ്ങിപ്പോകുകയാണിപ്പോൾ. കഴിഞ്ഞ ദിവസം ജില്ലാ ജനറൽ ആശുപത്രിയിൽ ക്യൂ നിന്ന ശേഷം ചികിത്സ കിട്ടാതെ രോഗി കുഴഞ്ഞു വീണ സംഭവത്തിന് ശേഷം ആശുപത്രി അധികൃതർ രോഗികളോട് കടുത്ത അലംഭാവം കാണിക്കുന്നതായി നാട്ടുകാർ പറയുന്നു. ഇന്നലെ വൈകിട്ട്

4.30ന് ഡോക്ടറെ കാണാനെത്തിയവർക്ക് 7മണിയായിട്ടും കാണാൻ കഴിഞ്ഞില്ലെന്നാണ് രോഗികൾ പറയുന്നത്. ഒരു ഡോക്ടർ മാത്രമേ ഡ്യൂട്ടിക്ക് ഉണ്ടായിരുന്നുള്ളു.

ഉച്ചയ്ക്ക് 1ന് ഒ.പി അടച്ചാൽ പിന്നീട് ക്യാഷ്വാലിറ്റിയാണ് രോഗികൾക്കാശ്രയം. പനി പടർന്ന് പിടിക്കുന്നതോടെ ദിവസേന രണ്ടായിരത്തിലധികം രോഗികളാണ് ഇവിടെ ചികിത്സ തേടിയെത്തുന്നത്.ട്രോമാ കെയറും പ്രവർത്തിക്കുന്നില്ല.

പ്രവർത്തിക്കാത്ത ട്രോമാ കെയർ യൂണിറ്റ്

ജില്ലാ ആശുപത്രിയിൽ ട്രോമാ കെയർ യൂണിറ്റ് എന്ന വലിയ ബോർഡ് സ്ഥാപിച്ചിട്ടുള്ളതല്ലാതെ ഇതിൽ പറയുന്ന യാതൊരു സൗകര്യവുമില്ലെന്ന് നാട്ടുകാർ പറയുന്നു.

കഴിഞ്ഞ ദിവസം രോഗി കുഴഞ്ഞ് വീണ് മരിക്കാൻ ഇടയായ സാഹചര്യവും ട്രോമാ കെയർ സംവിധാനം ഇവിടെ ഇല്ലാത്തത് കാരണമാണ്.

വേണ്ടത്

1. വിദഗ്ദ്ധ ഡോക്ടർമാർ: ട്രോമ സർജൻമാർ, ഓർത്തോപീഡിഷൻമാർ, അനസ്തെറ്റിസ്റ്റുകൾ, ന്യൂറോ സർജൻമാർ എന്നിവരുടെ സേവനം 24 മണിക്കൂറും ലഭ്യമായിരിക്കണം.
2. അത്യാധുനിക സംവിധാനങ്ങൾ: വെന്റിലേറ്റർ, അടിയന്തര ശസ്ത്രക്രിയ തിയേറ്ററുകൾ, മോണിറ്ററുകൾ, എക്സ്-റേ, സി.ടി സ്കാൻ തുടങ്ങിയവ.
3. ഐ.സി.യുവും ബ്ലഡ് ബാങ്കും: ഗുരുതര പരിക്കേറ്റവരെ ചികിത്സിക്കാൻ തീവ്രപരിചരണ വിഭാഗവും,രക്തം ലഭ്യമാകുന്ന ബ്ലഡ് ബാങ്കും.
4. ആംബുലൻസ് ശൃംഖല: കനിവ് 108 പോലെയുള്ള അത്യാധുനിക ആംബുലൻസുകളും വിദഗ്ദ്ധരായ പാരാമെഡിക്കൽ ജീവനക്കാരും.

ഇന്നലെ മണിക്കൂറുകളോളംരോഗികളെ പരിശോധിക്കാൻ ക്യാബിനിൽ ഡോക്ടറുണ്ടായില്ല.

രോഗി മരിക്കാനിടയായ സംഭവത്തെ തുടർന്ന് സെക്യൂരിറ്റി ജീവനക്കാരനെ ജോലിയിൽ നിന്നും മാറ്റിയതല്ലാതെ, യാതൊരു അടിയന്തര നവീകരണ പ്രവർത്തനവും ഇവിടെ നടപ്പാക്കിയിട്ടില്ല.