ഇ സിഗററ്റുകൾ പിടികൂടാനെത്തിയ പൊലീസിന് നേരെ അക്രമം; ഒരാൾ പിടിയിൽ

ശംഖുംമുഖം: നിരോധിച്ച ഇ -സിഗരറ്റ് വിൽക്കുന്നത് പിടികൂടാനെത്തിയ എസ്.ഐ ഉൾപ്പെടെയുള്ള പൊലീസുകാരെ ബീമാപള്ളി പ്രദേശത്ത് കടയുടമയുടെ നേതൃത്വത്തിൽ ആക്രമിച്ചു. പൂന്തുറ എസ്.ഐ ശ്രീജേഷ്,പൊലീസുകാരനായ അഭിലാഷ് എന്നിവർക്ക് പരിക്കേറ്റ സംഭവത്തിൽ കടയുടമ ബീമാപളളി പുതുവൽ പുത്തൻ വീട്ടിൽ മുനീർഖാനെ ( 35) പൊലീസ് അറസ്റ്റുചെയ്തു.

കടയിൽ അനധികൃതമായി ഇ സിഗററ്റുകളും വിദേശ നിർമ്മിത വ്യാജസിഗററ്റുകളും വ്യാപകമായി വിൽക്കുന്നതായി രഹസ്യവിവരം ലഭിച്ചതിനെ തുടർന്നാണ് പൊലീസുകാരെത്തിയത്. പരിശോധനയിൽ പത്ത് ലക്ഷത്തിലധികം രൂപ വിലവരുന്ന ഇ സിഗററ്റുകളും വിദേശ നിർമ്മിത വ്യാജ സിഗററ്റുകളും പൊലീസ് കണ്ടത്തി. ഇതോടെ ഉടമയുടെ നേതൃത്വത്തിൽ സംഘം ചേർന്ന് പൊലീസിനെ ആക്രമിക്കുകയായിരുന്നു. കൂടുതൽ പൊലീസ് സ്ഥലത്തെത്തി കടയുടമയെ കസ്റ്റഡിയിലെടുത്ത് സ്റ്റേഷനിലേക്ക് മാറ്റി. നിരോധിത ഉത്പന്നങ്ങൾ വിറ്റതിനും പൊലീസിനെ ഉപദ്രവിച്ചതിനും ഇയാൾക്കെതിരെ രണ്ടുകേസുകൾ രജിസ്റ്റർ ചെയ്തു.