ടെക്‌നോസിറ്റിയിൽ 100 കോടി രൂപയുടെ സയൻസ് – ടെക്നോളജി എക്‌സ്‌പീരിയൻസ് പാർക്കിന്റെ ധാരണാപത്രം കൈമാറി

തിരുവനന്തപുരം: കേരളത്തിന്റെ സാങ്കേതികവിദ്യാ നവീകരണ മേഖലയെ കൂടുതൽ ശക്തിപ്പെടുത്തുന്നതിന്റെ ഭാഗമായി ടെക്നോസിറ്റി, തിരുവനന്തപുരത്ത് നിർദിഷ്‌ട സെമികണ്ടക്ടർ കപ്പാസിറ്റി ബിൽഡിംഗ് പാർക്ക് & സയൻസ് – ടെക്നോളജി എക്‌സ്‌പീരിയൻസ് പാർക്കിന്റെ ധാരണാപത്രം (MoU) ഔദ്യോഗികമായി കൈമാറി.

കേരള സർക്കാർ ഐടി ആൻഡ് വ്യവസായ വകുപ്പ് മന്ത്രി പി കെ കുഞ്ഞാലിക്കുട്ടി, എക്‌സ്‌ട്രാ ജി ക്ലബ് പ്രൈവറ്റ് ലിമിറ്റഡിന്റെ മാനേജിംഗ് ഡയറക്ടർ അനിയൻ കോശിക്ക് ധാരണാപത്രം ഔദ്യോഗികമായി കൈമാറി. ചടങ്ങിൽ കേരള സർക്കാർ ഐടി സെക്രട്ടറി ശ്രീറാം സാംബശിവ റാവു, എക്‌സ്‌ട്രാ ജി ക്ലബിന്റെ ചീഫ് ഓപ്പറേറ്റിംഗ് ഓഫീസർ ജോണി കുരുവിള, IIITM-K ഡയറക്ടർ പ്രൊഫ. അലക്സ് ജെയിംസ്, IIITM-K രജിസ്ട്രാർ രാജീവ് കുമാർ; CoE on IIoT Sensors-ന്റെ CEO സെബിൻ സണ്ണി, Maker Village CEO വെങ്കട്ട് രാഘവേന്ദ്ര എന്നിവരും പങ്കെടുത്തു.

10 ഏക്കർ വിസ്‌തൃതിയിൽ, എക്‌സ്‌ട്രാ ജി ക്ലബ്, IIITM-K, കേരളവുമായി സഹകരിച്ച് വികസിപ്പിക്കുന്ന പദ്ധതിക്ക് പ്രാരംഭമായി 100 കോടി രൂപ നിക്ഷേപം കണക്കാക്കുന്നു. സെമികണ്ടക്‌ടർ ശേഷിവികസനം, അനുഭവാധിഷ്ഠിത ശാസ്ത്രപഠനം, നൂതന സാങ്കേതികവിദ്യകൾ, നവീകരണം, സംരംഭകത്വം, വ്യവസായ സഹകരണം എന്നിവയെ ഒരൊറ്റ സംവിധാനത്തിൽ കൊണ്ടുവരുന്നതാണ് പദ്ധതിയുടെ ലക്ഷ്യം. വിദ്യാർത്ഥികൾ, പ്രൊഫഷണലുകൾ, ഗവേഷകർ, സംരംഭകർ, പൊതുജനങ്ങൾ എന്നിവർക്ക് ഇന്ററാക്ടീവ്, പ്രായോഗിക പഠനാനുഭവങ്ങൾ ലഭ്യമാക്കും.

പദ്ധതിയിൽ 300ലധികം ടെക്നോളജി ഗാലറികളും 500ലധികം ഇന്ററാക്ടീവ് അനുഭവങ്ങളും നിർദിഷ്ടമാണ്. ആർട്ടിഫിഷ്യൽ ഇന്റലിജൻസ്, റോബോട്ടിക്‌സ്, ഇലക്ട്രോണിക്‌സ്, ബഹിരാകാശ സാങ്കേതികവിദ്യ, ക്വാണ്ടം ടെക്നോളജി, ഫ്യൂച്ചർ മൊബിലിറ്റി, ബയോടെക്നോളജി, പുനരുപയോഗ ഊർജം, സ്മാർട്ട് സിറ്റികൾ, കമ്മ്യൂണിക്കേഷൻ, ഓട്ടോമേഷൻ, അഡ്വാൻസ്‌ഡ് മാനുഫാക്ചറിംഗ് തുടങ്ങിയ മേഖലകൾ ഇതിൽ ഉൾപ്പെടും.

പ്രധാന ആകർഷണങ്ങളിലൊന്നായ “How Things Work” ഗാലറികളിലൂടെ സ്മാർട്ട്ഫോണുകൾ, ഇലക്ട്രിക് വാഹനങ്ങൾ, വിമാനങ്ങൾ, റോബോട്ടുകൾ, ഉപഗ്രഹങ്ങൾ, ആർട്ടിഫിഷ്യൽ ഇന്റലിജൻസ് തുടങ്ങിയവയുടെ പിന്നിലെ സാങ്കേതികവിദ്യ പരിചയപ്പെടുത്തും. “World@2050 / Future Science” അനുഭവത്തിലൂടെ ഭാവിയിലെ സാങ്കേതികവിദ്യകളിലേക്കും സാധ്യതകളിലേക്കും സന്ദർശകർക്ക് ഒരു ദൃശ്യാനുഭവം ലഭിക്കും.

പഠനം → കൗതുകം → പരീക്ഷണം → നവീകരണം → സംരംഭകത്വം എന്ന തുടർച്ചയായ പാത സൃഷ്ടിച്ച് സ്കൂളുകൾ, സർവകലാശാലകൾ, ഗവേഷകർ, സ്റ്റാർട്ടപ്പുകൾ, വ്യവസായങ്ങൾ എന്നിവയെ ബന്ധിപ്പിക്കുകയാണ് പദ്ധതിയുടെ ലക്ഷ്യം.

പദ്ധതി ഘട്ടംഘട്ടമായി നടപ്പാക്കുകയും വിശദമായ ആസൂത്രണം, സാദ്ധ്യതാപഠനങ്ങൾ, നിയമാനുസൃത നടപടികൾ എന്നിവയുടെ അടിസ്ഥാനത്തിൽ അന്തിമ രൂപവും സമയക്രമവും നിശ്ചയിക്കുകയും ചെയ്യും. തിരുവനന്തപുരം നഗരത്തെ സാങ്കേതികവിദ്യ, പഠനം, നവീകരണം എന്നിവയുടെ പ്രമുഖ കേന്ദ്രമായി കൂടുതൽ ശക്തിപ്പെടുത്തുന്നതിൽ പദ്ധതി നിർണായക പങ്കുവഹിക്കുമെന്നാണ് പ്രതീക്ഷിക്കുന്നത്.