ആഗോള പേറ്റന്റ് പട്ടികയിൽ ജിയോ പ്ളാറ്റ്‌ഫോംസ്

ടോപ് 20ലെ ആദ്യ ഇന്ത്യൻ കമ്പനി

കൊച്ചി: റിലയൻസ് ഇൻഡസ്ട്രീസിന്റെ സാങ്കേതിക വിഭാഗമായ ജിയോ പ്ലാറ്റ്‌ഫോംസ് ലോക ബൗദ്ധിക സ്വത്തവകാശ സംഘടനയുടെ ഏറ്റവും പുതിയ പേറ്റന്റ് റാങ്കിംഗിൽ ആഗോളതലത്തിൽ ആദ്യ 20 സ്ഥാനങ്ങളിൽ ഇടംപിടിച്ചു. 2025-ലെ പട്ടികയിൽ നിന്ന് 320 സ്ഥാനം മെച്ചപ്പെടുത്തിയാണ് ജിയോ ഈ നേട്ടം കൈവരിച്ചത്. ഹുവായ്, സാംസംഗ്, ക്വാൽകോം, ഗൂഗിൾ, ആപ്പിൾ തുടങ്ങിയവയാണ് പട്ടികയിലുള്ള മറ്റ് കമ്പനികൾ. ഈ പട്ടികയിൽ സ്ഥാനം പിടിക്കുന്ന ഏക ഇന്ത്യൻ ടെക് കമ്പനിയാണ് ജിയോ. 'ഡീപ്-ടെക്' സ്ഥാപനമാകാൻ ജിയോ നടത്തുന്ന വർഷങ്ങളുടെ പരിശ്രമങ്ങളുടെ തെളിവാണ് പുതിയ റാങ്കിംഗെന്ന് മാനേജിംഗ് ഡയറക്ടർ ആകാശ് അംബാനി പറഞ്ഞു.

5G, 6G, ആർട്ടിഫിഷ്യൽ ഇന്റലിജൻസ്, ക്ലൗഡ്-നേറ്റീവ് പ്ലാറ്റ്‌ഫോമുകൾ, ഇന്റലിജന്റ് ഓട്ടോമേഷൻ, റേഡിയോ ആക്‌സസ്, എഡ്ജ് ഇന്റലിജൻസ്, നെറ്റ്‌വർക്ക് സ്ലൈസിംഗ് തുടങ്ങിയവയാണ് ജിയോ ഊന്നൽ നൽകുന്ന പ്രധാന മേഖലകൾ. കമ്പനി പുറത്തുവിട്ട കണക്കുകൾ പ്രകാരം മാർച്ച് 31 വരെ ജിയോ ആകെ ഫയൽ ചെയ്തത് 6817 പേറ്റന്റുകളാണ്.