ദേശീയ സാമ്പത്തിക സാക്ഷരതാ ക്വിസിൽ കുസാറ്റിന് മൂന്നാം സ്ഥാനം

കൊച്ചി: നാഷണൽ ഇൻസ്റ്റിറ്റിറ്റ്യൂട്ട് ഒഫ് സെക്യൂരിറ്റീസ് മാർക്കറ്റ്‌സും (എൻ.ഐ.എസ്.എം) സെക്യൂരിറ്റീസ് ആൻഡ് എക്‌സ്‌ചേഞ്ച് ബോർഡ് ഒഫ് ഇന്ത്യയും (സെബി) സംയുക്തമായി സംഘടിപ്പിച്ച നാഷണൽ ഫിനാൻഷ്യൽ ലിറ്ററസി ക്വിസ് (എൻ.എഫ്.എൽ.ക്യു) 2026ന്റെ ദക്ഷിണ മേഖലാ റൗണ്ട് ബിരുദാനന്തര വിഭാഗത്തിൽ കൊച്ചിൻ യൂണിവേഴ്‌സിറ്റി ഒഫ് സയൻസ് ആൻഡ് ടെക്‌നോളജിയിലെ സെന്റർ ഫോർ ബഡ്‌ജറ്റ് സ്റ്റഡീസ് മൂന്നാം സ്ഥാനം നേടി. കൊച്ചിൻ യൂണിവേഴ്‌സിറ്റി ടീം ദേശീയ റൗണ്ടിലേക്കും യോഗ്യത നേടി.

ആഗസ്റ്റ് 8, 9 തിയതികളിൽ ബംഗളൂരുവിലെ ആർ.എൻ.എസ് ഇൻസ്റ്റിറ്റിറ്റ്യൂട്ട് ഒഫ് ടെക്‌നോളജിയിലായിരുന്നു ദക്ഷിണ മേഖലാ റൗണ്ട്. കേരളം, തമിഴ്‌നാട്, ആന്ധ്രാപ്രദേശ്, കർണാടക, തെലങ്കാന, പുതുച്ചേരി എന്നിവിടങ്ങളിൽ നിന്നുള്ള ബിരുദ, ബിരുദാനന്തര വിദ്യാർത്ഥികൾ മത്സരത്തിൽ പങ്കെടുത്തു. സാമ്പത്തിക വിപണികൾ, നിക്ഷേപ തത്വങ്ങൾ, നിക്ഷേപക സംരക്ഷണം, ഉത്തരവാദിത്തപരമായ സാമ്പത്തിക പ്രവർത്തനങ്ങൾ തുടങ്ങിയ വിഷയങ്ങളാണ് ക്വിസിൽ ഉൾപ്പെട്ടത്.

രാജ്യവ്യാപകമായി കോളേജ്, ഓൺലൈൻ യോഗ്യതാ റൗണ്ടുകളിലായി നാല് ലക്ഷത്തിലധികം വിദ്യാർത്ഥികൾ എൻ.എഫ്.എൽ.ക്യൂ 2026ൽ പങ്കെടുത്തു. ദക്ഷിണ മേഖലയിൽ നിന്ന് ദേശീയ റൗണ്ടിലേക്ക് യോഗ്യത നേടിയ 12 ബിരുദാനന്തര സ്ഥാപനങ്ങളിൽ കുസാറ്റിലെ സെന്റർ ഫോർ ബഡ്‌ജറ്റ് സ്റ്റഡീസും ഉൾപ്പെടുന്നു. നവംബറിൽ മഹാരാഷ്ട്രയിലെ പാതൽഗംഗയിലുള്ള എൻ.ഐ.എസ്.എം ക്യാമ്പസിലാണ് ദേശീയ ഫൈനൽ നടക്കുന്നത്.