ടിക്ക്... ടിക്ക്... ഹിമാലയമെന്ന ‘ടൈം ബോംബ്’; മഞ്ഞുരുകുന്നു, ഇന്ത്യയെ കാത്തിരിക്കുന്നത് മഹാദുരന്തം?

ന്യൂഡൽഹി: ഹിമാലയം വെറും മഞ്ഞുമൂടിയ പർവതനിരകളല്ല. കോടിക്കണക്കിന് മനുഷ്യരുടെ കുടിവെള്ളത്തിന്റെയും കൃഷിയുടെയും വൈദ്യുതിയുടെയും നിലനിൽപ്പുമായി നേരിട്ട് ബന്ധപ്പെട്ടിരിക്കുന്ന പ്രകൃതിയുടെ വലിയ ജലസംഭരണിയാണ്. എന്നാൽ കാലാവസ്ഥാ വ്യതിയാനം ഈ മേഖലയുടെ സ്വാഭാവിക ഘടനയെ അതിവേഗം മാറ്റുകയാണ്. ഹിമാനികൾ ഉരുകുന്നു, മഞ്ഞുപാളികൾ പിൻവാങ്ങുന്നു, ഹിമാനി തടാകങ്ങൾ വലുതാകുന്നു. ഇതോടെ ഒരു വലിയ ദുരന്തസാധ്യതയാണ് രൂപപ്പെടുന്നത്.

എന്തുകൊണ്ടാണ് ഹിമാലയത്തെ ‘മൂന്നാം ധ്രുവം’ എന്ന് വിളിക്കുന്നത്?

ഭൂമിയുടെ ഏറ്റവും വടക്കേയറ്റമായ ആർട്ടിക് സമുദ്ര മേഖലയായ ഉത്തരധ്രുവമായും അന്റാർട്ടിക്കയെ ദക്ഷിണധ്രുവമായും കണക്കാക്കുമ്പോൾ ഹിമാലയത്തെ മൂന്നാം ധ്രുവം എന്നാണ് വിശേഷിപ്പിക്കുന്നത്. ഉത്തരധ്രുവത്തിനും ദക്ഷിണധ്രുവത്തിനും പുറത്തുള്ള ലോകത്തിലെ ഏറ്റവും വലിയ മഞ്ഞുസംഭരണി പ്രദേശങ്ങളിലൊന്നായതിനാലാണ് ഈ പേര് ലഭിച്ചത്. ഹിമാലയം, ഹിന്ദുകുഷ്, തിബറ്റൻ പീഠഭൂമി എന്നിവ ഉൾപ്പെടുന്ന വിശാലമായ പ്രദേശത്തെയാണ് സാധാരണയായി 'മൂന്നാം ധ്രുവം' എന്ന് വിളിക്കുന്നത്.

ഇവിടെയുള്ള ഹിമാനികളിൽ ശേഖരിക്കപ്പെടുന്ന മഞ്ഞ് പതുക്കെ ഉരുകിയാണ് നിരവധി പ്രധാന നദികളിലേക്ക് വെള്ളമെത്തുന്നത്. സിന്ധു, ഗംഗ, ബ്രഹ്മപുത്ര തുടങ്ങിയ നദീതടങ്ങളിലെ കോടിക്കണക്കിന് ജനങ്ങളുടെ ജീവിതത്തിന് ഈ ജലസ്രോതസുകൾ നിർണായകമാണ്. അതുകൊണ്ടുതന്നെ ഹിമാലയത്തിൽ സംഭവിക്കുന്ന മാറ്റങ്ങൾ പർവതപ്രദേശങ്ങളിൽ മാത്രം ഒതുങ്ങുന്നില്ല.

ഹിമാനികൾ പിൻവാങ്ങുമ്പോൾ?

താപനില ഉയരുന്നതിനനുസരിച്ച് ഹിമാനികൾ വേഗത്തിൽ ഉരുകുകയാണ്. തുടക്കത്തിൽ ഇത് നദികളിലേക്ക് കൂടുതൽ വെള്ളമെത്താൻ കാരണമാകാം. എന്നാൽ ദീർഘകാലാടിസ്ഥാനത്തിൽ ഹിമാനികളുടെ വലുപ്പം കുറയുന്നതോടെ നദികളിലേക്കുള്ള ജലലഭ്യതയിലും മാറ്റമുണ്ടാകാം. ഇത് കൃഷിയെയും കുടിവെള്ള വിതരണത്തെയും ജലവൈദ്യുത പദ്ധതികളെയും ബാധിക്കാനുള്ള സാദ്ധ്യതയുണ്ട്.

ഹിമാനി തടാകങ്ങൾ വിനാശകാരിയാകുമോ?​

ഹിമാനികൾ ഉരുകുമ്പോൾ അവയുടെ മുന്നിലും ചുറ്റുമായി വെള്ളം കെട്ടിക്കിടന്ന് വലിയ തടാകങ്ങൾ രൂപപ്പെടാം. ഇവയാണ് ഹിമാനി തടാകങ്ങൾ അഥവാ ഗ്ളേഷിയൽ ലേക്സ്. ഇത്തരം തടാകങ്ങൾ മഞ്ഞും പാറകളും ഉൾപ്പെടുന്ന പ്രകൃതിദത്ത തടയണകളാൽ തടഞ്ഞുനിൽക്കുകയാണ്. ഈ തടയണ തകർന്നാൽ വൻതോതിൽ വെള്ളം താഴേക്ക് കുതിച്ചെത്താം. ഇതിനെ ഹിമാനി തടാക വിസ്ഫോടന പ്രളയം എന്നാണ് വിളിക്കുന്നത്.

മുന്നറിയിപ്പില്ലാതെ സംഭവിച്ചാൽ മണിക്കൂറുകൾക്കുള്ളിൽ താഴ്‌വരകളെയും ഗ്രാമങ്ങളെയും റോഡുകളെയും പാലങ്ങളെയും വൈദ്യുത പദ്ധതികളെയും തകർക്കാൻ ശേഷിയുള്ള പ്രളയമായി ഇത് മാറാം. കൂടാതെ,​ ഹിമാലയത്തിലെ ഉയർന്ന പ്രദേശങ്ങളിൽ വർഷങ്ങളായി സ്ഥിരമായി തണുത്തുറഞ്ഞുകിടക്കുന്ന മണ്ണും പാറകളും അടങ്ങിയ മേഖലകളുണ്ട്. താപനില ഉയരുമ്പോൾ ഇവ ഉരുകാൻ തുടങ്ങും. ഇതോടെ പർവതപ്രദേശങ്ങളുടെ സ്ഥിരത കുറയുകയും മണ്ണിടിച്ചിലിന്റെയും പാറ ഇടിയുന്നതിന്റെയും സാദ്ധ്യത വർദ്ധിക്കും.

നേപ്പാൾ ഒരു മുന്നറിയിപ്പോ?​

ഹിമാലയത്തിലെ മാറ്റങ്ങൾ എത്രത്തോളം ഗുരുതരമാകാമെന്നതിന്റെ ഉദാഹരണങ്ങളാണ് സമീപകാലത്ത് നേപ്പാളിൽ സംഭവിച്ച മിന്നൽ പ്രളയം. പർവതപ്രദേശങ്ങളിൽ രൂപപ്പെടുന്ന അപകടങ്ങൾ താഴ്ന്ന പ്രദേശങ്ങളിലേക്കും അതിവേഗം വ്യാപിക്കാമെന്നതാണ് ഇത്തരം സംഭവങ്ങൾ നൽകുന്ന പ്രധാന മുന്നറിയിപ്പ്.

ഇന്ത്യയെ കാത്തിരിക്കുന്നതെന്ത്?​

ഹിമാലയത്തിന്റെ വലിയൊരു ഭാഗം ഇന്ത്യയുടെ വടക്കൻ സംസ്ഥാനങ്ങളുമായി ബന്ധപ്പെട്ടതാണ്. ഹിമാലയത്തിൽ നിന്നുള്ള നദികൾ ഇന്ത്യയുടെ ജലസുരക്ഷയുടെ അടിത്തറയാണ്. ഹിമാനികളുടെ വേഗത്തിലുള്ള ഉരുകൽ തുടർന്നാൽ ഒരുവശത്ത് പെട്ടെന്നുള്ള വെള്ളപ്പൊക്കത്തിനും മറുവശത്ത് ഭാവിയിൽ ജലക്ഷാമത്തിനും സാദ്ധ്യതയുണ്ട്. ഇതിനൊപ്പം മണ്ണിടിച്ചിൽ, റോഡ് തകർച്ച, പാലങ്ങൾക്കും കെട്ടിടങ്ങൾക്കും നാശം, ജലവൈദ്യുത പദ്ധതികൾക്ക് ഭീഷണി തുടങ്ങിയ പ്രത്യാഘാതങ്ങളും ഉണ്ടാകാം.

ഹിമാലയത്തിലെ മാറ്റങ്ങൾ ഒരു ദിവസംകൊണ്ട് സംഭവിക്കുന്നതല്ല. വർഷങ്ങളായി പതുക്കെ നടക്കുന്ന മാറ്റങ്ങളാണ് വലിയ അപകടസാദ്ധ്യതകളിലേക്ക് നയിക്കുന്നത്. ഹിമാനികൾ ഉരുകി ഹിമാനി തടാകങ്ങൾ വലുതാകാൻ കാരണമാകും. ഇത് പർവതപ്രദേശങ്ങളുടെ സ്ഥിരത കുറയാൻ കാരണമാകും. തുട‌ർന്ന് പെട്ടെന്നുള്ള മണ്ണിടിച്ചിലും മിന്നൽ പ്രളയങ്ങളും വർദ്ധിക്കും. താഴ്ന്ന പ്രദേശങ്ങളിലെ ജനജീവിതത്തെയും അടിസ്ഥാന സൗകര്യങ്ങളെയും ഇത് പ്രതികൂലമായി ബാധിക്കും. അതുകൊണ്ടാണ് ഹിമാലയത്തിലെ ഇപ്പോഴത്തെ മാറ്റങ്ങളെ ടിക്ക് ചെയ്യുന്ന ടൈം ബോംബ് എന്ന് വിശേഷിപ്പിക്കുന്നത്.

മുന്നോട്ടുള്ള വഴിയെന്ത്?​

ഹിമാലയത്തിലെ ഓരോ മാറ്റവും കൃത്യമായി നിരീക്ഷിക്കുക എന്നതാണ് ഇനി മുന്നിലുള്ള ഏക പ്രതിവിധി. അപകടസാദ്ധ്യതയുള്ള ഹിമാനി തടാകങ്ങൾ കണ്ടെത്തി മുന്നറിയിപ്പ് സംവിധാനങ്ങൾ ശക്തിപ്പെടുത്തേണ്ടതുണ്ട്. ദുരന്തസാദ്ധ്യതയുള്ള പ്രദേശങ്ങളിൽ നിർമാണ നിയന്ത്രണങ്ങൾ ഏർപ്പെത്തേണ്ടതുണ്ടോയെന്ന് പരിശോധിക്കണം. കാലാവസ്ഥാ വ്യതിയാനത്തിന്റെ വേഗത കുറയ്ക്കാനുള്ള ആഗോള ശ്രമങ്ങൾക്കൊപ്പം ഹിമാലയൻ മേഖലയിലെ പ്രാദേശികതലത്തിലുള്ള ദുരന്ത പ്രതിരോധവും ശക്തിപ്പെടുത്തേണ്ടതുണ്ട്.

ഹിമാലയം മാറുന്നുവെന്നത് ഒരു മുന്നറിയിപ്പ് മാത്രമല്ല. ആ മാറ്റത്തിന്റെ പ്രത്യാഘാതങ്ങൾ താഴ്‌വരകളിലേക്കും നഗരങ്ങളിലേക്കും എത്തിക്കൊണ്ടിരിക്കുകയാണ്. ഉയരേണ്ട ചോദ്യം ഹിമാലയം എത്ര വേഗത്തിൽ മാറുന്നു എന്നതല്ല,​ ആ മാറ്റത്തെ നേരിടാൻ ഇന്ത്യ എത്ര വേഗത്തിൽ തയ്യാറെടുക്കുന്നു എന്നതാണ്.