41 കുടുംബങ്ങളുടെ കണ്ണീർ, ചില വേദനകളും മുറിവുകളും മറക്കാനാകില്ല; കരൂർ ദുരന്തത്തിന് ഒരു വർഷം

ചെന്നൈ: 41 പേരുടെ ജീവനെടുത്ത കരൂർ ദുരന്തം ഒരു വർഷം പിന്നിടുമ്പോൾ ന‌ടനും തമിഴ്നാട് മുഖ്യമന്ത്രിയുമായ സി. ജോസഫ് വിജയ്‌യുടെ രാഷ്ട്രീയ ജീവിതത്തിലും സംഭവം നിർണായക അദ്ധ്യായമായി തുടരുകയാണ്. 2025 സെപ്തംബർ 27ന് തമിഴക വെട്രി കഴകം (ടി.വി.കെ) സംഘടിപ്പിച്ച റാലിക്കിടെയുണ്ടായ തിക്കിലും തിരക്കിലും പെട്ട് 41 പേർ മരിക്കുകയും നൂറിലേറെ പേർക്ക് പരിക്കേൽക്കുകയും ചെയ്തിരുന്നു.

കരൂർ–ഈറോഡ് ദേശീയപാതയിലെ വേലുസാമിപുരത്താണ് ദുരന്തമുണ്ടായത്. ടി.വി.കെ അദ്ധ്യക്ഷനായ വിജയ്‌യെ കാണാൻ ആയിരക്കണക്കിന് ആളുകളാണ് ഇവിടെ എത്തിയിരുന്നത്. വിജയ്‌യുടെ വരവ് മണിക്കൂറുകളോളം വൈകിയതോടെ ജനക്കൂട്ടത്തിൽ വലിയ തിരക്ക് രൂപപ്പെട്ടിരുന്നു. വിജയ് എത്തിയതിന് പിന്നാലെ വാഹനത്തിന് സമീപത്തേക്ക് ജനക്കൂട്ടം നീങ്ങിയതാണ് ദുരന്തത്തിലേക്ക് കലാശിച്ചതെന്നാണ് റിപ്പോർട്ടുകൾ.

സംഭവത്തിന് പിന്നാലെ കേന്ദ്ര-സംസ്ഥാന സർക്കാരുകളും വിവിധ രാഷ്ട്രീയ പാർട്ടികളും അനുശോചനം രേഖപ്പെടുത്തുകയും മരിച്ചവരുടെ കുടുംബങ്ങൾക്ക് ധനസഹായം പ്രഖ്യാപിക്കുകയും ചെയ്തു. അന്നത്തെ മുഖ്യമന്ത്രി എം.കെ. സ്റ്റാലിൻ സംഭവത്തെക്കുറിച്ച് അന്വേഷിക്കാൻ ഏകാംഗ അന്വേഷണ കമ്മിഷനെയും നിയോഗിച്ചിരുന്നു.

റാലിയുമായി ബന്ധപ്പെട്ട സുരക്ഷാ നിർദേശങ്ങൾ പാലിക്കുന്നതിലും ആവശ്യമായ മുൻകരുതലുകൾ സ്വീകരിക്കുന്നതിലും ടി.വി.കെ നേതൃത്വത്തിന് വീഴ്ച സംഭവിച്ചെന്നായിരുന്നു പൊലീസിന്റെ ആരോപണം. നിയന്ത്രണങ്ങളും ഗതാഗത നിയമങ്ങളും ലംഘിച്ചതായും പൊലീസ് ചൂണ്ടിക്കാട്ടി. ടി.വി.കെ ജനറൽ സെക്രട്ടറി എൻ. ആനന്ദ് അടക്കമുള്ള നേതാക്കൾക്കെതിരെ എഫ്.ഐ.ആറും രജിസ്റ്റർ ചെയ്തിരുന്നു.

തുടർന്ന് കേസ് സിബിഐ അന്വേഷണത്തിന് വിട്ടു. 2026 ജൂണിൽ അന്വേഷണം വീണ്ടും ആരംഭിച്ചതായും റിപ്പോർട്ടുകളുണ്ട്. ദുരന്തത്തിന് ശേഷം കരൂരിലെത്തിയ വിജയ്, സംഭവം തനിക്ക് വലിയ വേദനയുണ്ടാക്കിയെന്നും മരിച്ചവരുടെ സ്മരണയ്ക്കായി ടി.വി.കെ സ്മാരകം നിർമിക്കുമെന്നും പറഞ്ഞു. 2026ലെ നിയമസഭാ തിരഞ്ഞെടുപ്പിൽ ടി.വി.കെ 108 സീറ്റുകൾ നേടി, തുടർന്ന് സഖ്യകക്ഷികളുടെ പിന്തുണയോടെയാണ് വിജയ് മുഖ്യമന്ത്രിയായി അധികാരത്തിലേറിയത്.

മുഖ്യമന്ത്രിയായ ശേഷവും കരൂർ ദുരന്തം തന്റെ ജീവിതത്തിലെ ഏറ്റവും വലിയ വേദനകളിലൊന്നാണെന്ന് അദ്ദേഹം വ്യക്തമാക്കി. മരിച്ചവരുടെ കുടുംബങ്ങൾക്ക് തമിഴ്നാട് സർക്കാർ 10 ലക്ഷം രൂപ വീതവും ടി.വി.കെ 20 ലക്ഷം രൂപ അധികമായും ധനസഹായം പ്രഖ്യാപിച്ചിരുന്നു. പിന്നീട് ദുരന്തം ഡി.എം.കെ സർക്കാരിനെതിരായ വിജയ്‌യുടെ രാഷ്ട്രീയ വിമർശനങ്ങളിലും ഇടംപിടിച്ചു.