ദിവസം മുഴുവൻ ഇൻസ്റ്റഗ്രാമിൽ റീൽസ് കണ്ടാൽ മതി, ശമ്പളം നൽകും; വേറിട്ട ജോലി വാഗ്‌ദാനവുമായി കമ്പനി

ഉദയ്‌പൂർ: ദിവസം മുഴുവൻ ഇൻസ്റ്റഗ്രാം റീൽസ് കണ്ടിരിക്കുന്നതിന് ശമ്പളം ലഭിച്ചാലോ? കേൾക്കുമ്പോൾ കൗതുകം തോന്നുമെങ്കിലും രാജസ്ഥാനിലെ ഉദയ്‌പൂർ ആസ്ഥാനമായി പ്രവർത്തിക്കുന്ന ഇൻഫ്ലൂയിഷ് എന്ന കമ്പനിയാണ് ഇത്തരമൊരു ജോലി വാഗ്‌ദാനം ചെയ്‌തിരിക്കുന്നത്. ദീപാവലിയോടനുബന്ധിച്ചാണ് കമ്പനി വ്യത്യസ്‌തമായ ഈ തൊഴിൽ അവസരം പ്രഖ്യാപിച്ചത്.

ഇൻസ്റ്റഗ്രാമിൽ ദിവസം മുഴുവൻ റീൽസ് കണ്ട് പ്ലാറ്റ്‌ഫോമിൽ ട്രെൻഡിംഗാകുന്നതും വൈറലാകുന്നതുമായ ഉള്ളടക്കങ്ങൾ കണ്ടെത്തി റിപ്പോർട്ട് ചെയ്യുകയാണ് ജോലിയുടെ പ്രധാന ഉത്തരവാദിത്തം. ഇതുമായി ബന്ധപ്പെട്ട് കമ്പനിയിലെ ജീവനക്കാർ സോഷ്യൽ മീഡിയയിൽ പങ്കുവച്ച വീഡിയോയും ശ്രദ്ധ നേടുകയാണ്.

ഇൻസ്റ്റഗ്രാം ഉപയോഗിക്കാൻ ഏറെ ഇഷ്‌ടമുള്ളവർക്കാണ് കമ്പനി അവസരം നൽകുന്നത്. മണിക്കൂറോളം റീൽസ് കാണുന്ന ശീലമുള്ളവർക്കും ഇത് അനുയോജ്യമായ ജോലിയാണെന്നാണ് കമ്പനി പറയുന്നത്. 'ഇൻസ്റ്റഗ്രാം ഉപയോഗിക്കാൻ നിങ്ങൾക്ക് ശരിക്കും ഇഷ്‌ടമാണെങ്കിൽ അതിന് ഞങ്ങൾ പണം നൽകും. ദിവസം മുഴുവൻ റീൽസ് സ്‌ക്രോൾ ചെയ്‌ത് ഇൻസ്റ്റഗ്രാമിൽ എന്തൊക്കെയാണ് വൈറലാകുന്നതെന്ന് കണ്ടെത്തി മറ്റുള്ളവരെ അറിയിക്കാൻ കഴിയുന്ന ഡൂംസ്‌ക്രോളറെയാണ് ഞങ്ങൾ അന്വേഷിക്കുന്നത്'- കമ്പനി പ്രതിനിധി വീഡിയോയിൽ പറയുന്നു. താൽപര്യമുള്ളവർ വീഡിയോയ്‌ക്ക് താഴെ 'ഹായ്' എന്ന് കമന്റ് ചെയ്യണമെന്നും കമ്പനി പ്രതിനിധി പറയുന്നുണ്ട്.