'രഹസ്യമായ ആ വിദേശ അവധിക്കാല യാത്രകൾ ഒഴിവാക്കൂ'; രാഹുൽ ഗാന്ധിയെ ഉപദേശിച്ച് കേന്ദ്ര മന്ത്രി

ന്യൂഡൽഹി: പ്രധാനമന്ത്രി നരേന്ദ്ര മോദിയുമായി തുറന്ന ചർച്ച ആവശ്യപ്പെടുന്ന കോൺഗ്രസ് നേതാവ് രാഹുൽ ഗാന്ധിക്ക് മറുപടി നൽകി കേന്ദ്രമന്ത്രി കിരൺ റിജിജു. രാഹുൽ ഗാന്ധി ഇത്തരം കാര്യങ്ങൾ ചെയ്താൽ കോൺഗ്രസ് പാർട്ടിക്ക് കൂടുതൽ എംപിമാരെ ലഭിക്കും എന്ന തലക്കെട്ടോടുകൂടി ഏഴ് ഉപദേശങ്ങളാണ് റിജിജു രാഹുൽ ഗാന്ധിക്ക് നൽകുന്നത്. സമൂഹമാദ്ധ്യമത്തിൽ പങ്കുവച്ച കുറിപ്പിലൂടെയാണ് പ്രതികരണം.

1. ഇന്ത്യയിൽ കൂടുതൽ സമയം ചെലവഴിക്കുക. ഇടയ്ക്കിടെയുള്ള രഹസ്യ വിദേശ അവധിക്കാല യാത്രകൾ ഒഴിവാക്കുക.
2. മുതിർന്നവരെ ബഹുമാനിക്കുകയും പ്രായമായവരിൽ നിന്ന് വിലപ്പെട്ട അറിവ് നേടുകയും ചെയ്യുക. ഇത് ഇന്ത്യയുടെ സംസ്‌കാരത്തിന്റെ ഭാഗമാണ്.
3. ഇന്ത്യാവിരുദ്ധരുമായി കൂടിക്കാഴ്‌ച ഒഴിവാക്കുക, അവരുടെ അജണ്ട പ്രചരിപ്പിക്കുന്നത് അവസാനിപ്പിക്കുക.
4. ബിജെപി, ആർഎസ്‌എസ്, മോദി എന്നിവരോടുള്ള കടുത്ത വെറുപ്പ് അവസാനിപ്പിക്കുക. ബിജെപിയെ ശത്രുയായിട്ടല്ലാതെ രാഷ്‌ട്രീയ എതിരാളിയായി കാണുക.
5. പാർലമെന്റിനെ കൂടുതൽ ഗൗരവത്തോടെ കാണുക. എംപിമാരെ ചർച്ചകളിലും സംവാദങ്ങളിലും പങ്കെടുക്കാൻ അനുവദിക്കുക.
6. ഇന്ത്യൻ ഭരണഘടനയെ ബഹുമാനിക്കുകയും ഭരണഘടനാ സ്ഥാപനങ്ങളെ ആദരിക്കുകയും ചെയ്യുക.
7. കോൺഗ്രസ് പാർട്ടിയെ ഒരു ജനാധിപത്യ പാർട്ടിയായി പ്രവർത്തിക്കാൻ അനുവദിക്കുകയും, കുടുംബവാഴ്ചാ രാഷ്ട്രീയം തകർക്കുകയും ചെയ്യുക.

ഇതിനുമുൻപ് തന്റെ പ്രസംഗത്തിനിടെ പ്രതിപക്ഷ എംപിമാർ പാർലമെന്റിൽ നിന്ന് ഇറങ്ങിപ്പോകുന്നതിന്റെ ദൃശ്യങ്ങൾ പങ്കുവച്ച് റിജിജു വിമർശനം ഉന്നയിച്ചിരുന്നു. 'സംവാദങ്ങൾക്കും ചർച്ചകൾക്കുമുള്ള ഇടമാണ് പാർലമെന്റ്. എന്നാൽ ജനാധിപത്യം, ചർച്ചകൾ, സംവാദം എന്നിവയിൽ വിശ്വാസമില്ലാത്തവരാണ് ചർച്ചയെക്കുറിച്ച് സംസാരിക്കുന്നത്' എന്ന് വിമർശിച്ചുകൊണ്ടായിരുന്നു കേന്ദ്രമന്ത്രി ദൃശ്യങ്ങൾ പങ്കുവച്ചത്.

Congress Party can win more MPs if Rahul Gandhi ji can do these:

1. Spend more time in India and avoid secret foreign vacations frequently.
2. Respect seniors and gain valuable wisdom from the elders, which is Indian tradition.
3. Do not meet Anti-India people and stop promoting their agenda.
4. End deep hatred against BJP, RSS & Modi Ji. Treat BJP as political opponent, not enemy.
5. Take Parliament more seriously and let MPs take part in debates & discussion.
6. Respect Constitution of India, and honour Constitutional Institutions.
7. Allow Congress party to function as a democratic party and smash dynastic politics.

— Kiren Rijiju (@KirenRijiju) November 4, 2026