നാലടിച്ച് റയൽ മൂന്നാമതെത്തി

മാഡ്രിഡ് : സ്പാനിഷ് ലാ ലിഗ ഫുട്ബാളിൽ കഴിഞ്ഞരാത്രി നടന്ന മത്സരത്തിൽ സെവിയ്യയെ 4-1ന് തോൽപ്പിച്ച് റയൽ മാഡ്രിഡ് മൂന്നാം സ്ഥാനത്തേക്ക് ഉയർന്നു.റയലിനായി കിലിയൻ എംബാപ്പെ ഇരട്ട ഗോളടിച്ചപ്പോൾ അർദ ഗുലേറും യാൻ ഡയമൻഡേയും ഓരോ ഗോളടിച്ചു. 30-ാം മിനിട്ടിൽ ഗുലേറിലൂടെയാണ് റയൽ സ്കോറിംഗ് തുടങ്ങിയത്. 37-ാം മിനിട്ടിൽ എംബാപ്പെ തന്റെ ആദ്യ ഗോൾ നേടി. 63-ാം മിനിട്ടിൽ പെനാൽറ്റിയിലൂടെ രണ്ടാം ഗോളും. 80-ാം മിനിട്ടിൽ മാനു ബുയേനയാണ് സെവിയ്യയുടെ ആശ്വാസ ഗോൾ നേടിയത്. 82-ാം മിനിട്ടിൽ ഡയമൻഡേ റയലിന്റെ നാലാം ഗോളും നേടി.

ഒൻപത് മത്സരങ്ങളിൽ ഏഴാം വിജയം നേടിയ റയൽ 21 പോയിന്റുമായാണ് മൂന്നാമതുള്ളത്. 27 പോയിന്റുമായി ബാഴ്സലോണയാണ് ഒന്നാമത്.22 പോയിന്റുള്ള അത്‌ലറ്റിക്കോ മാഡ്രിഡിനാണ് രണ്ടാം സ്ഥാനം.