കോളടിച്ചേ ! ജില്ലയ്‌ക്ക് കരുതലുമായി വി.ഡി.എസ് ബഡ്‌ജറ്റ്

കൊച്ചി: കന്നിബഡ്‌ജറ്റിൽ സ്വന്തം ജില്ലയ്‌ക്ക് കരുതലും പരിഗണനയും നൽകി ധനമന്ത്രി കൂടിയായ മുഖ്യമന്ത്രി വി.ഡി സതീശൻ. പൊതുപദ്ധതികൾക്ക് പുറമെ, കൊച്ചി പോർട്ട് മാനുഫാക്ചറിംഗ് സോൺ, ഗ്ളോബൽ കൺവെൻഷൻ സെന്റർ, അന്താരാഷ്ട്ര ഫിലിം സിറ്റി, ആഗോള ഫർണിച്ചർ ഹബ് തുടങ്ങിയ പദ്ധതികൾ ജില്ലയ്‌ക്ക് ലഭിച്ചു.

കൊച്ചി തുറമുഖത്തിന് ചുറ്റുമായി വ്യാവസായിക നിർമ്മാണ മേഖലകൾ (ഇൻഡസ്ട്രിയൽ മാനുഫാക്ചറിംഗ് സോൺസ്), സ്റ്റഫിംഗ് സെന്ററുകൾ, ഡ്രൈ പോർട്ട് എന്നിവ സ്ഥാപിക്കും

കൊച്ചിയെ ചെറുകിട തുറമുഖങ്ങളുമായി ബന്ധിപ്പിച്ച് ജലഗതാഗതവും ചരക്കുനീക്കവും വർദ്ധിപ്പിക്കും

അന്താരാഷ്ട്ര വിമാനത്താവളത്തിന് സമീപം ഗ്ലോബൽ കൺവെൻഷൻ സെന്റർ

കൊച്ചിയിലെ യൂണിഫൈഡ് മെട്രോപൊളിറ്റൻ ട്രാൻസ്‌പോർട്ട് അതോറിട്ടി കൂടുതൽ കാര്യക്ഷമമാക്കും.

ജെ.സി.ഡാനിയേലിന്റെ പേരിൽ അന്താരാഷ്ട്ര ഫിലിംസിറ്റി സ്ഥാപിക്കുന്നതിനായി 100 കോടി

പെരുമ്പാവൂർ കേന്ദ്രമായി പ്ലൈവുഡ്, ഫർണിച്ചർ നിർമ്മാണ കോറിഡോറാക്കി കൊച്ചി-ആലുവ-പെരുമ്പാവൂർ മേഖലയെ ഫർണിച്ചർ-ഹോംവെയർ നിർമ്മാണ ഗ്ളോബൽ ഹബായി വികസിപ്പിക്കും. തുടക്കമായി 10 കോടി രൂപ

കൊച്ചി-തൃശൂർ മേഖലയെ പ്രധാന ആഗോള സ്വർണാഭരണ നിർമ്മാണ ഇടനാഴിയായി വികസിപ്പിക്കും. ഗോൾഡ് എക്സ്ചേഞ്ചും ജ്വല്ലറി മാനുഫാക്ചറിംഗ് പാർക്കും സ്ഥാപിക്കും. 10കോടി രൂപ.

ആരോഗ്യ, വിദ്യാഭ്യാസ മേഖലകളിലെ നിക്ഷേപങ്ങൾ വർദ്ധിപ്പിക്കുന്ന ഡെസ്‌റ്റിനേഷൻ പോയിന്റ് സൂപ്പർ സ്‌പെഷ്യാലിറ്റി ആശുപത്രികളുള്ള കൊച്ചിക്ക് നേട്ടമാകും

ഏവിയേഷൻ ഹബ് പദ്ധതിയിൽ കൊച്ചിക്ക് പ്രധാനസ്ഥാനം ലഭിക്കും. യാത്ര, ചരക്കുനീക്കം എന്നിവയ്‌ക്ക് അടിസ്ഥാനസൗകര്യങ്ങൾ വർദ്ധിപ്പിക്കുന്നത് കയറ്റുമതി, വിനോദസഞ്ചാരം, വിമാനങ്ങളുടെ അറ്റകുറ്റപ്പണി എന്നിവയ്ക്ക് നേട്ടം

കേരള എം.എസ്.എം.ഇ ഗ്രോത്ത് സ്‌കീം ചെറുകിടവ്യവസായങ്ങൾ ധാരാളമുള്ള ജില്ലയ്‌ക്ക് നേട്ടമാകും. ഐ.ടി, ആർട്ടിഫിഷ്യൽ ഇന്റലിജൻസ് മേഖലകൾക്ക് ഗുണകരമാകും.

ഉന്നതവിദ്യാഭ്യാസ കേന്ദ്രമായി മാറ്റാനുള്ള കേരള നോളജ് വാലി പദ്ധതി ദേശീയ, അന്താരാഷ്ട്ര വിദ്യാഭ്യാസ സ്ഥാപനങ്ങൾക്ക് വഴിതുറക്കും.

ഭൂപരിഷ്‌കരണവും ലാൻഡ് പൂളിംഗ് ഫ്രെയിംവർക്ക് പദ്ധതിയും സംരംഭകർക്ക് ഗുണകരമാകും. ഇൻഫോപാർക്ക് മൂന്നാംഘട്ടത്തിന്റെ വികസനത്തിന് ലാൻഡ് പൂളിംഗിലൂടെ സ്ഥലം വികസിപ്പിക്കാനുള്ള പദ്ധതിക്ക് വേഗത കൈവരും

റബറിന്റെ താങ്ങുവില 200ൽ നിന്ന് 250 രൂപയാക്കുന്നത് കർഷകർക്ക് ആശ്വാസമാകും

പഴംകൃഷി പ്രോത്സാഹനം പൈനാപ്പിൾ ഉൾപ്പെടെ കർഷകർക്ക് നേട്ടമാകും

പനങ്ങാട് ആസ്ഥാനമായ കേരള യൂണിവേഴ്സിറ്റി ഒഫ് ഫിഷറീസ് ആൻഡ് ഓഷ്യൻ സ്റ്റഡീസിന് (കുഫോസ് ) 33.5 കോടി രൂപ

മണ്ണെണ്ണ സബ്സിഡി വർദ്ധനവ്, തൊഴിലാളികൾക്ക് ഭവനപദ്ധതി, തീരദേശവാസികൾക്ക് പട്ടയം, ഹൈടെക് ഫിഷ് നഴ്സറി, അലങ്കാരമത്സ്യക്കൃഷി തുടങ്ങിയവ മത്സ്യമേഖലയ്‌ക്ക് പ്രയോജനകരം

ടൂറിസത്തെ വ്യവസായപദവി ഉൾപ്പെടെയുള്ള പദ്ധതികൾ നേട്ടമാകും

ഫോർട്ട്കൊച്ചിയിൽ ഗ്രീൻമാർഷൽസ് പദ്ധതിയിൽ സ്ത്രീകൾക്ക് പരിശീലനം

ഗോശ്രീ -ബോൾഗാട്ടി സമാന്തരപാലം നിർമ്മിക്കും. ഗോശ്രീ -മാമംഗലം റോഡിന് സ്ഥലം ഏറ്റെടുക്കാനും നടപടികൾക്കും ഒരുകോടി രൂപ

കൂനമ്മാവിൽ ചാവറയച്ചന്റെ സ്‌മാരകത്തിന്റെ തുടർനിർമ്മാണത്തിന് ഒരുകോടി

നടൻ സലിംകുമാറിന് എറണാകുളത്ത് സ്‌മാരകം നിർമ്മിക്കാൻ ഒരുകോടി

കോതമംഗലം ചേലാട്ട് അന്താരാഷ്ട്ര കായികസ്റ്റേഡിയം

എറണാകുളം മെഡിക്കൽ കോളേജ് നവീകരണത്തിന് 10 കോടി

പെരിയാർവാലി ജലസേചന പദ്ധതിയുടെ അറ്റകുറ്റപ്പണിക്ക് അഞ്ചുകോടി