ശബരിമല ദർശനത്തിന് 10 ഇടത്ത് ഇന്നുമുതൽ സ്‌പോട്ട് ബുക്കിംഗ്

തിരുവനന്തപുരം: ശബരിമല ദർശനത്തിനായി പത്തു കേന്ദ്രങ്ങളിൽ ഇന്നു മുതൽ സ്‌പോട്ട് ബുക്കിംഗ് തുടങ്ങുമെന്ന് സർക്കാരും തിരുവിതാംകൂർ ദേവസ്വം ബോർഡും ഹൈക്കോടതിയിൽ അറിയിച്ചു.

എരുമേലി, നിലയ്ക്കൽ, കുമളി എന്നീ കേന്ദ്രങ്ങൾക്ക് പുറമെ തിരുവനന്തപുരം ശ്രീകണ്‌ഠേശ്വരം മഹാദേവക്ഷേത്രം, ഏറ്റുമാനൂർ ശ്രീമഹാദേവ ക്ഷേത്രം, വൈക്കം ശ്രീമഹാദേവ ക്ഷേത്രം, കൊട്ടാരക്കര ശ്രീ മഹാഗണപതി ക്ഷേത്രം, പന്തളം വലിയകോയിക്കൽ ക്ഷേത്രം പെരുമ്പാവൂർ ശ്രീധർമ്മശാസ്താ ക്ഷേത്രം, കീഴില്ലം ശ്രീമഹാദേവ ക്ഷേത്രം എന്നിവിടങ്ങളിലാണ് സ്പോട്ട് ബുക്കിംഗ് സജ്ജമാക്കിയിരിക്കുന്നത്.

വെർച്ച്വൽ ക്യൂവിലൂടെ മുൻകൂർ ബുക്ക് ചെയ്യാത്ത തീർത്ഥാടകർക്ക് ഈ സംവിധാനം പ്രയോജനപ്പെടുത്താം.

ആധാർ കാർഡ്, വോട്ടേഴ്സ് ഐ.ഡി എന്നിവയ്ക്കു പുറമേ പാസ്പോർട്ടും തിരിച്ചറിയൽ രേഖയായി ഉപയോഗിക്കാം. രണ്ടു ഡോസ് വാക്സിനുമെടുത്തെന്ന സർട്ടിഫിക്കറ്റോ 72 മണിക്കൂറിനുള്ളിലെടുത്ത ആർ.ടി.പി.സി.ആർ നെഗറ്റീവ് സർട്ടിഫിക്കറ്റോ ഹാജരാക്കണം