അന്താരാഷ്ട്ര മയക്കുമരുന്ന് വിതരണം: ഒളിവിൽ കഴിഞ്ഞിരുന്ന മുഖ്യപ്രതി പിടിയിൽ

വർക്കല: അന്താരാഷ്ട്ര മയക്കുമരുന്ന് വിതരണ ശൃംഖലയുമായി ബന്ധമുള്ള എം.ഡി.എം.എ കേസിൽ ഒളിവിൽ കഴിഞ്ഞിരുന്ന മുഖ്യപ്രതി വർക്കലയിൽ പിടിയിൽ. കാട്ടാക്കട സ്വദേശി മുഹമ്മദ് അനസിനെയാണ് (29) പന്തളം പൊലീസിന്റെ പ്രത്യേക അന്വേഷണസംഘം പിടികൂടിയത്. ബംഗളൂരുവിൽ ഊബർ ടാക്സിയുടെ മറവിൽ എം.ഡി.എം.എ വിറ്റഴിച്ച കേസിലാണ് അറസ്റ്റ്.​ അന്താരാഷ്ട്ര മയക്കുമരുന്ന് ശൃംഖലയുമായി ബന്ധമുണ്ടെന്ന് സംശയിക്കപ്പെടുന്ന നൈജീരിയൻ സ്വദേശി സാമുവൽ ക്ലബ്സൻ വോക്കാഫോറിന്റെ പ്രധാന കൂട്ടാളിയാണ് അനസ് എന്നാണ് പൊലീസിന്റെ കണ്ടെത്തൽ.

ഈ കേസിൽ നേരത്തെ നാലുപേർ അറസ്റ്റിലായിരുന്നു. അന്വേഷണം ശക്തമാക്കിയതോടെ പ്രതി ഡൽഹിയിലേക്കും പിന്നീട് മണാലിയിലേക്കും കടക്കുകയായിരുന്നു. ഒടുവിൽ കേരളത്തിൽ തിരിച്ചെത്തി വർക്കലയിൽ ഒളിവിൽ കഴിയുന്നതിനിടയിലാണ് പിടിയിലായത്.​ കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. മയക്കുമരുന്ന് വിതരണ ശൃംഖലയുമായുള്ള പ്രതിയുടെ ബന്ധവും, കേസിൽ കൂടുതൽ പേർക്ക് പങ്കുണ്ടോയെന്നും കണ്ടെത്താൻ പൊലീസ് അന്വേഷണം വ്യാപിപ്പിച്ചിട്ടുണ്ട്.