ജർമ്മനിയിലെ യോഗവി​ദ്യാശ്രമത്തി​ൽ 'ദൈവദശകം': ജർമ്മൻ ഭാഷയിൽ ആലപിച്ചത് 350 വിദേശികൾ

കൊല്ലം: ജർമ്മനിയിലെ യോഗവിദ്യ ആശ്രമത്തിൽ വിവിധ രാജ്യങ്ങളിലെ 350 പേർ ചേർന്ന് ജർമ്മൻ ഭാഷയിൽ ശ്രീനാരായണ ഗുരുദേവന്റെ 'ദൈവദശകം' ആലപിച്ചത് ചരി​ത്രമായി​. യോഗവിദ്യ സ്ഥാപകനായ സുകദേവ് ബ്രിറ്റ്സ് വിശുദ്ധ ദീപം തെളിയിച്ച് ചടങ്ങ് ഉദ്ഘാടനം ചെയ്തു. ശ്രീനാരായണ ഫോറം ഫോർ യൂണിവേഴ്സൽ ബ്രദർഹുഡ് ചെയർമാൻ ഡോ. വരുൺ​ രാധാകൃഷ്ണൻ മുഖ്യപ്രഭാഷണം നടത്തി.

ഗുരുദേവന്റെ ദർശനങ്ങൾ ലോകജനത ഏറ്റെടുക്കാൻ തുടങ്ങി​യതി​ന്റെ സന്ദേശമാണെന്ന് ഡോ. വരുൺ​ രാധാകൃഷ്ണൻ പറഞ്ഞു. 'ഇത് ഒരു സാംസ്കാരിക പരിപാടിയല്ല,ലോക സമാധാനത്തിന്റെയും മാനവസൗഹാർദ്ദത്തിന്റെയും പുതിയ തുടക്കമാണ്. ശ്രീനാരായണ ഗുരുവിന്റെ സന്ദേശങ്ങൾ അതിരുകൾ കടന്ന് ലോകമനസുകളിലേക്ക് എത്തി. വരും ദിവസങ്ങളിൽ വിദേശികളുടെ കൂടുതൽ പങ്കാളിത്തത്തോടെ ഇത്തരത്തിലുള്ള പരിപാടികൾ സംഘടിപ്പിക്കാനാണ് ലക്ഷ്യം'- അദ്ദേഹം പറഞ്ഞു.യോഗവിദ്യ സ്ഥാപകൻ സുകദേവ് ബ്രിറ്റ്സ് ശ്രീനാരായണ ഗുരുവിന്റെ സർവമാനവിക സന്ദേശങ്ങളെക്കുറിച്ച് പ്രഭാഷണം നടത്തി. ഡോ. വരുൺ രാധാകൃഷ്ണൻ മലയാളത്തിൽ ദൈവദശകം ആലപിച്ചു. തുടർന്നാണ് ശ്രേയ വരുണിന്റെ നേതൃത്വത്തിൽ 350 വിദേശികൾ ജർമ്മൻ ഭാഷയിൽ ദൈവദശകം ആലപിച്ചത്.