ചടയമംഗലത്ത് ഓടിക്കൊണ്ടിരുന്ന കെഎസ്‌ആർടിസി ബസിന് തീപിടിച്ചു; യാത്രക്കാർ സുരക്ഷിതർ

കൊല്ലം: ചടയമംഗലത്ത് കെഎസ്ആർടിസി സൂപ്പർഫാസ്റ്റ് ബസിന് തീപിടിച്ചു. ഇന്ന് പുലർച്ചെ അഞ്ചരയോടെ കുരിയോടിന് സമീപമായിരുന്നു അപകടം. പുനലൂരിൽനിന്ന് തിരുവനന്തപുരത്തേയ്‌ക്ക് പോകുകയായിരുന്ന ബസിനാണ് തീപിടിച്ചത്. അപകടസമയത്ത് എട്ട് യാത്രക്കാരാണ് ബസിലുണ്ടായിരുന്നത്. ബസ് ജീവനക്കാർ സമയോചിതമായി ഇടപെട്ടതിനാൽ യാത്രക്കാർക്കും പരിക്കേറ്റില്ല.

യാത്രയ്‌ക്കിടയിൽ ബസിൽനിന്ന് പുക ഉയരുന്നത് ശ്രദ്ധയിൽപ്പെട്ട ഉടൻതന്നെ ഡ്രൈവർ വാഹനം റോഡരികിൽ നിർത്തി യാത്രക്കാരെയെല്ലാം പുറത്തേക്കുമാറ്റി. നിമിഷങ്ങൾക്കകംതന്നെ ബസിലേക്ക് തീപടർന്നുപിടിക്കാൻ തുടങ്ങി. കടയ്‌‌ക്കലിൽനിന്ന് ഫയർഫോഴ്‌സ് സംഘമെത്തിയാണ് തീയണച്ചത്. തീപിടിത്തത്തിന്റെ കൃത്യമായ കാരണം വ്യക്തമായിട്ടില്ല.