പരീക്ഷാത്തട്ടിപ്പ്: അദ്ധ്യാപകരുടെ വിവരങ്ങൾ എസ്‌.ഐ.ടിക്ക് കൈമാറും

തിരുവനന്തപുരം: ആസൂത്രണ ബോർഡ് പരീക്ഷാത്തട്ടിപ്പിൽ ചോദ്യപേപ്പർ തയ്യാറാക്കിയവരുടെയും ഉത്തരക്കടലാസുകൾ മൂല്യനിർണയം നടത്തിയ അദ്ധ്യാപകരുടെയും വിവരങ്ങൾ പ്രത്യേക അന്വേഷണ സംഘത്തിനു കൈമാറാൻ പി.എസ്‌.സി തീരുമാനം. രഹസ്യാത്മകതയുടെ പേരിൽ ഈ വിവരങ്ങൾ ഇനി തടഞ്ഞുവയ്ക്കേണ്ടതില്ലെന്ന് ഇന്നുചേർന്ന പി.എസ്‌.സി യോഗം വിലയിരുത്തി.

​അദ്ധ്യാപകരുടെ പേര്, മേൽവിലാസം, മൊബൈൽ നമ്പർ എന്നിവയ്ക്കുപുറമെ പി.എസ്‌.സി ചെയർമാൻ എം.ആർ.ബൈജുവിന്റെയും മറ്റ് അംഗങ്ങളുടെയും മൊബൈൽ നമ്പറുകളും അന്വേഷണ സംഘത്തിനു കൈമാറും. എസ്‌.ഐ.ടിയുടെ പ്രത്യേക ആവശ്യപ്രകാരമാണിത്.

​പ്രാഥമിക അന്വേഷണ ഘട്ടത്തിൽ ചോദ്യപേപ്പർ തയ്യാറാക്കിയവരുടെയും മൂല്യനിർണയം നടത്തിയവരുടെയും വിവരങ്ങൾ അന്വേഷണസംഘം തേടിയിരുന്നെങ്കിലും നൽകിയിരുന്നില്ല. ഈ വിവരങ്ങൾ ലഭിക്കാതെ അന്വേഷണം മുന്നോട്ടുപോകില്ലെന്ന് വ്യക്തമാക്കിയ എസ്‌.ഐ.ടി, വിവരങ്ങൾ ആവശ്യപ്പെട്ട് പി.എസ്‌.സിക്ക് വീണ്ടും നോട്ടീസ് നൽകുകയായിരുന്നു.