സുപ്രീംകോടതിയെ നിലപാട് അറിയിച്ചു ജില്ലാ ജഡ്‌ജിമാരുടെ വിരമിക്കൽ പ്രായം വർദ്ധിപ്പിക്കരുതെന്ന് കേരളം

ന്യൂഡൽഹി: ജില്ലാ ജഡ്‌ജിമാരുടെ വിരമിക്കൽ പ്രായം 60ൽ നിന്ന് 62 ആയി വർദ്ധിപ്പിക്കുന്നതിനെ കേരളം അടക്കം 10 സംസ്ഥാനങ്ങൾ സുപ്രീംകോടതിയിൽ എതിർത്തു. കേരളത്തിനു പുറമെ ഉത്തർപ്രദേശ്,​ ഉത്തരാഖണ്ഡ്,​ ഒഡിഷ,​ പഞ്ചാബ്,​ ഹരിയാന,​ രാജസ്ഥാൻ,​ മണിപ്പൂർ,​ മേഘാലയ,​ നാഗാലാൻഡ് സംസ്ഥാനങ്ങളാണ് എതിർപ്പ് ഉന്നയിക്കുന്നത്. തീരുമാനം പുന:പരിശോധിക്കാൻ കഴിയുമോയെന്ന് ചീഫ് ജസ്റ്റിസ് സൂര്യകാന്ത് അദ്ധ്യക്ഷനായ ബെഞ്ച് ഈ സംസ്ഥാനങ്ങളോട് ചോദിച്ചിട്ടുണ്ട്. ജില്ലാ ജഡ്‌ജിമാരുടെ വിരമിക്കൽ പ്രായം വർദ്ധിപ്പിക്കണമെന്ന ഓൾ ഇന്ത്യ ജഡ്‌ജസ് അസോസിയേഷന്റെ ഹർജിയാണ് കോടതിയിലുള്ളത്. രണ്ടാഴ്ചയ്‌ക്കകം വീണ്ടും പരിഗണിക്കും. കർണാടക,​ തെലങ്കാന,​ തമിഴ്നാട്, ​ഛത്തീസ്ഗഢ്,​ പശ്ചിമ ബംഗാൾ,​ മഹാരാഷ്ട്ര,​ മദ്ധ്യപ്രദേശ്,​ സിക്കിം സംസ്ഥാനങ്ങൾ അനുകൂലമാണ്. ബാക്കി സംസ്ഥാനങ്ങൾ തീരുമാനമെടുത്തിട്ടില്ല.