ചായയുടെയും ലഘു ഭക്ഷണങ്ങളുടെയും അളവ് കുറയുന്നു,​ പിന്നിൽ ഒറ്റക്കാരണം

തൊടുപുഴ: എല്ലാ മാസവും വാണിജ്യആവശ്യത്തിനുള്ള പാചകവാതക വിലവർദ്ധന ഹോട്ടൽ വ്യവസായത്തിന് പ്രതിസന്ധിയാകുന്നതായി വ്യാപാരികൾ. ഒറ്റയടിക്ക് വില വർദ്ധിപ്പിച്ചാൽ പരാതി ഉയരുമെന്നതിനാൽ ഓരോ മാസവും 10- 12 രൂപ നിരക്കിലാണ് വില കൂട്ടുന്നതെന്നാണ് പ്രധാന ആരോപണം.

കഴിഞ്ഞ‍ ദിവസം 12.50 രൂപയാണ് വർദ്ധിപ്പിച്ചത്. ഇതോടെ നിലവിൽ 19 കിലോഗ്രാം വാണിജ്യസിലിണ്ടറിന് 2840- 2860 രൂപ നിരക്കിലാണ് വില. കഴിഞ്ഞ സെപ്തംബറിൽ 9.50 രൂപയും ഒക്ടോബറിൽ 62.50 രൂപയും വർദ്ധിപ്പിച്ചതിന് പുറമേയാണ് നിലവിലെ നിരക്ക് വർദ്ധനവ്. ഗാർഹിക എൽ.പി.ജി സിലിണ്ടർ വില നിലവിൽ വർദ്ധിപ്പിച്ചിട്ടില്ലാത്തതാണ് ഏക ആശ്വാസമെങ്കിലും ഇതുംഎപ്പോൾ വേണമെങ്കിലും വർദ്ധിപ്പാക്കാമെന്നതാണ് സ്ഥിതി.

:

 പ്രതിസന്ധി രൂക്ഷം

വില വർദ്ധനവ് ഭക്ഷ്യവ്യാപാരമേഖലയിൽ വലിയ പ്രത്യാഘാതങ്ങൾക്ക് ഇടയാക്കിയിരിക്കുകയാണെങ്കിലും സർക്കാർ ഇടപെടുന്നില്ലെന്നാണ് വ്യാപാരികളുടെയും സംഘടനകളുടെയും പരാതി. മുമ്പ് 800- 900 രൂപ നിരക്കിൽ നിന്നിരുന്ന ഗ്യാസ് വിലയാണ് മൂവായിരത്തിനടുത്ത് എത്തിയിരിക്കുന്നത്. പരമാവധി 1000 - 1200 രൂപ വരെയാെക്കെയാണെങ്കിൽ പ്രതിസന്ധിയില്ലാതെ കാര്യങ്ങൾ മുന്നോട്ട് കൊണ്ടുപോകാനാകും. എന്നാൽ പശ്ചിമേഷ്യൻ യുദ്ധത്തിന്റെ മറവിൽ വില കുതിച്ചുയരുകയാണുണ്ടായത്. ഹോട്ടലുകൾ, റസ്റ്റോറന്റുകൾ, തട്ടുകടകൾ, വാണിജ്യ ആവശ്യങ്ങൾക്ക് ഗ്യാസ് ഉപയോഗിക്കുന്ന മറ്റ് സ്ഥാപനങ്ങൾ എന്നിവയെ എല്ലാം വിലവർദ്ധനവ് കാര്യമായി ബാധിച്ചിട്ടുണ്ട്.

 വിലകൂടുന്നു,​ അളവ് കുറയുന്നു

വിലകൂടാൻ തുടങ്ങിയതോടെ നിരക്കിൽ മാത്രമല്ല ഭക്ഷണത്തിന്റെ അളവിലും വലിയ മാറ്റം വന്നിട്ടുണ്ട്. ചായയുടെയും ലഘുഭക്ഷണങ്ങളുടെയുമെല്ലാം അളവ് ദിനംപ്രതികുറയുന്നത് ഗ്യാസ് വില കുതിച്ചുയരുന്നതിനാലാണെന്നാണ് ബന്ധപ്പെട്ടവർ പറയുന്നത്. ഇതിന് പുറമേ നിത്യോപയോഗ സാധനങ്ങളുടെയും മത്സ്യ- മാംസങ്ങളുടെയുമെല്ലാം വില അനുദിനം കൂടുന്നതിനാൽ തീൻമേശയിൽ വിഭവങ്ങളുടെ അളവിലും കുറവ് വരുത്തുന്നതിന് ഇടയാക്കിയിട്ടുണ്ട്. നിരക്ക് ഉയർന്നതോടെ സാധാരണക്കാർ തങ്ങളുടെ പോക്കറ്റ് കാലിയാകാതെ വരവ് അറിഞ്ഞ് ചെലവഴിക്കുന്നതിലേക്കും കാര്യങ്ങൾ എത്തിക്കഴിഞ്ഞു. ഇത് ചെറുകിട ഭക്ഷണസ്ഥാപനങ്ങൾക്കാണ് വലിയ തിരിച്ചടിയായിരിക്കുന്നത്.