കൂന്തലുകളെപ്പറ്റി പഠിക്കാൻ ദക്ഷിണധ്രുവത്തിൽ...

കൊച്ചി: കൂന്തലുകളെക്കുറിച്ച് പഠിക്കാൻ കൊച്ചിയിലെ കേന്ദ്ര സമുദ്രമത്സ്യ ​ഗവേഷണ സ്ഥാപനത്തിലെ ശാസ്ത്രജ്ഞർ അന്റാർട്ടിക്കയിൽ. ഷെൽഫിഷ് ഫിഷറീസ് വിഭാ​ഗത്തിലെ പ്രിൻസിപ്പൽ സയന്റിസ്റ്റ് ഡോ . ഗീത ശശികുമാറും ടെക്നിക്കൽ ഓഫീസർ ഡോ.കെ.കെ.സജികുമാറുമാണ് പര്യവേഷണത്തിന്റെ ഭാ​ഗമായി ദക്ഷിണധ്രുവത്തിലെത്തിയത്. 47 ദിവസത്തെ പര്യവേഷണത്തിൽ 36 ദിവസം പിന്നിട്ടു.

പര്യവേഷണത്തിൽ 42 ​ഗവേഷകരാണുള്ളത്. കൂന്തൽ സാമ്പിളുകൾ ശേഖരിക്കുകയാണിപ്പോൾ. ശേഖരിച്ച കൂന്തൽ കുഞ്ഞുങ്ങളെ (പാരാ ലാർവെ) സി.എം.എഫ്.ആർ.ഐയിൽ തിരിച്ചെത്തി വിശദ പരിശോധനയ്ക്ക് വിധേയമാക്കും.

 കൂന്തലിന്റെ ലഭ്യത പഠന ലക്ഷ്യം

1. കൂന്തലിന്റെ ലഭ്യതയും അന്റാർട്ടിക്കൻ ആവാസവ്യവസ്ഥയിൽ അവയുടെ പങ്കും പഠിക്കും

2. ദക്ഷിണധ്രുവ പ്രദേശങ്ങളിൽ ഇവയുടെ ജൈവവൈവിദ്ധ്യം ശാസ്ത്രീയമായി മനസിലാക്കാനാകും.

3. ഇവയടെ ചെവിക്കല്ല് വിശകലനം ചെയ്ത് ഈ കൂന്തൽ ഇനങ്ങളുടെ വയസും വളർച്ചയും കണ്ടെത്താനുമാകും.

4. പഠനങ്ങൾ അന്റാർട്ടിക് സമുദ്രത്തിൽ ഇവയുടെ സമൃദ്ധിയും ശാസ്ത്രീയ സ്വഭാവവും മേഖലയിൽ അവയുടെ പാരിസ്ഥിതിക പ്രാധാന്യവും മനസിലാക്കാൻ സഹായിക്കും. 5. ദക്ഷിണദ്രുവ സമുദ്രത്തിലെ പറക്കും കൂന്തലിന്റെ ലഭ്യതയും പഠനവിധേയമാക്കുന്നുണ്ട്.

 ദൈത്യം ശ്രമകരം

മുൻകൂട്ടി നിശ്ചയിച്ച സ്ഥലങ്ങളിൽ ​ഗവേഷണ കപ്പൽ നിറുത്തിയാണ് ​സാമ്പിളുകൾ ശേഖരിക്കുന്നത്. ചുഴലിക്കാറ്റിന്റെ വരവും അതിശക്തമായ കാറ്റും കാരണം ഇളകി മറിയുന്ന കടലിൽ പലപ്പോഴും സാമ്പിൾ ശേഖരണം അതീവ ദുഷ്കരമാണ്. ഇതു വരെ, സഞ്ചാരപാതയിൽ മൂന്ന് ചുഴലിക്കാറ്റുകളെ നേരിടേണ്ടി വന്നു. താഴ്ന്ന മർദ്ദവും ഭീമൻ തിരമാലകളും ശക്തമായ കാറ്റോടെയുള്ള അതിശൈത്യവും അവ​ഗണിച്ചാണ് സർവേ നടത്തിവരുന്നത്. -22 ഡി​ഗ്രി വരെ താഴ്ന്ന താപനിലയിൽ മഞ്ഞുമലകൾക്കിടയിലൂടെയും പൊങ്ങിക്കിടക്കുന്ന ഐസ് പാളികളിലൂടെയും സഞ്ചരിച്ച് ഡേറ്റ ശേഖരണം നടത്തൽ വെല്ലുവിളികൾ നിറഞ്ഞതാണെന്ന് ഡോ. സജികുമാർ പറഞ്ഞു.